उत्तर प्रदेश के खबर

(मंगल, 18 अक्टूबर)

• लखनऊ में टीम अन्ना के अरविंद केजरीवाल पर हमला के कोशिश करे वाला एगो आदमी के पुलिस गिरफ्तार करिके पूछताछ करत बिया. हमला का बाद केजरीवाल कहले कि टीम अन्ना के कांग्रेस से कवनो तरह के दुश्मनी नइखे. कांग्रेसो एह हमला के निंदा कइले बिया आ कहले बिया कि हिंसा कवनो बात के समाधान ना कर सके.
• दिल्ली के एगो अदालत साल 2008 में भइल वोट खातिर नोट मामिला में समाजवादी पार्टी सांसद रेवती रमन सिंह के दिहल पुलिस के क्लीन चीट खारिज कर दिहलसि आ उनुका के तीन नवम्बर के अदालत में पेश होखे खातिर सम्मन जारी कर दिहलसि.
• मायावती सरकार के ‘मूर्ति माफिया’ आ ‘मुल्जिमन के सरकार’ बतावत भाजपा के राष्ट्रीय उपाध्यक्ष मुख्तार अब्बास नकवी मंगल का दिने कहलन कि पार्टी जल्दिये उत्तर प्रदेश के बसपा सरकार का कारनामा पर ब्लैक पेपर जारी करी.
• फरुखाबाद जिला में पटाखा से भरल एगो घर में विस्फोट से घर ढह गइल आ पांच लोग के मौत हो गइल. चार जने घवाहिलो भइल बाड़न,
• प्रदेश में प्राथमिक शिक्षक बहाली में अधिकतम उमिर बढ़ा के चालीस साल कर दिहल गइल बा. कम से कम उमिर अठारह साल रही. बीटीसी डिग्री वाला एह बहाली में आवेदन कर सकेले.
• प्रदेश में चिकित्सकन के कमी देखत आयुष चिकित्सकन के सेवा से हटावे के माँग करे वाली याचिका के उच्चतम न्यायालय मंगल का दिने खारिज कर दिहलसि.
• एह साल का आखिर ले प्रदेश में पाँच सौ दू गो नया गैस एजेंसी खोलल जाई जवना में से तीन सौ सतहत्तर गो ग्रामीण इलाका में खुली.
• प्रदेश सरकार अपना कर्मचारियन के तीस दिन के वेतन का बरोबर बोनस देबे के घोषणा कइले बिया जवना के भुगतान दिवाली के पहिले कर दिहल जाई. एह एलान से राज्य सरकार पर पाँच सौ छह करोड़ रुपिया के बोझा पड़ी.
• लोकायुक्त के जाँच का बाद प्रदेश के संस्कृति मंत्री सुभाष पाण्डेय के आरोपमुक्त कर दिहल गइल बा. जौनपुर के मछली शहर सीट से विधायक सुभाष पाण्डेय पर आरोप रहुवे कि ऊ काली मंदिर के जमीन हथिया लिहले बाड़े.