एह सदी के सबले लमहर चन्द्रग्रहण आजु
आजु रात १२ बज के ५० मिनट से शुरु होखे वाला चन्द्रग्रहण १०० मिनट तक रही. चन्द्रग्रहण के शुरुआत रात एगारह बज के बावन मिनट से शुरु हो जाई आ तीन बज के बत्तीस मिनट ले रही. एह सदी के ई सबले बड़हन चन्द्रग्रहण होखे जा रहल बा. एह बीच चन्द्रमा तरह तरह के रंग में आई. एहसे रात में जाग के चन्द्रग्रहण के देखल जरुरी बा. रोज रोज अइसन प्राकृतिक लीला ना होले.
बाबा के तबियत उनुका योग के हवा निकाल दिहलसि
बाबा रामदेव के अनशन का बाद के उतरल चेहरा देखि के आ डाक्टरी सलाह सुन के कि बाबा के अगिला कुछ दिन लें प्राणायाम आ योग करे से मना कइल गइल बा, आम आदमी के मन में बनल योग के छवि धूमिल भइल बा. बाबा जब अपने स्वास्थ्य अपना योग से ठीक ना कर सकसु त दोसरा के का ठीक करीहें ? एकरे के कहल जाला चौबे गइलन छब्बे बने दूबे बनि के अइलन. पड़लन राम कुकुर का पाले खींच खाँच ले गइलस खाले.
बड़कन का लड़ाई में लड़िकन के फजीहत
मगध विश्वविद्यालय आ वीर कुंवर सिंह विश्वविद्यालय के कुलपतियन के नियुक्ति के पटना उच्च न्यायालय गैरकानूनी बता दिहलसि त ऊ लोग सुप्रीम कोर्ट में चल गइल. जवना चलते ना त ऊ लोग प्रभार में बा ना दोसरा कुलपति के नियुक्ति हो रहल बा. सरकार कुलाधिपति राज्यपाल महोदय से कहलसि कि तबले प्रमंडलीय आयुक्तन के कुलपति के प्रभार दे दिहल जाव. बाकिर राज्यपाल महिदय कुछ सुनत नइखन. परिणाम ई बा कि विद्यार्थियन कें डिग्री नइखे मिल पावत आ शिक्षकन के तनखाह. देखल जाव महामहिम राज्यपाल कबले निर्णय लेत बाड़े.
बिहार के हॉकी टीम क्वार्टर फाइनल में
भोपाल में हो रहल पुरुष हॉकी चैम्पियनशिप का नॉक आउट में बिहार के टीम बंगाल के दू एक से हरा के क्वार्टर फाइनल में चहुँप गइल बिया. एकरा पहिले ऊ लीग मैचन में दिल्ली आ आंध्र प्रदेश के हरवले रहल.
साईं बाबा के मंदिर का गेट पर हत्या
काल्हु रात शिरडी के साईं बाबा के मंदिर का गेट नम्बर तीन पर दू गो नौजवानन के लाश मिलल बा जवनन के बेरहमी से कत्ल कइल गइल बा. मंदिर हमेशा अपना भक्तन से गुलजार रहेला बाकिर एह घटना के देखे वाला भा एकरा बारे में बतावेला केहू ना मिलल.
हर विश्वविद्यालय में खोल जाई सेंटर आफ एक्सेलेंस
यूपी का हर विश्वविद्यालय में हर विषय के एगो सेंटर आफ एक्सेलेंस खोलल जाई जहाँ ओह विषय से जुड़ल हर तरह के जानकारी आ अध्ययन के सुविधा मौजूद करावल जाई. एह केन्द्रन के दोसरो विश्वविद्यालयन से आपस में जोड़ल जाई.
0 Comments