बिहार के खबर

(मंगल, 25 अक्टूबर)

• उच्चतम न्यायालय के फैसला अइला का बाद राज्य में चौंतीस हजार पाँच सौ चालीस गो प्रशिक्षित प्रारंभिक शिक्षकन के बहाली के काम शुरू कर दिहल गइल बा. अगिला साल जनवरी से पहिले जिलावार काउन्सलिंग करवावल जाई. बतावल जात बा कि एस सी, एसटी, बीसी वन आ उर्दू के तमाम आवेदकन के बहाली हो जाई.
• धनतेरस का दिने पटना में तेरह अरब रुपिया से बेसी के कारोबार होखे के खबर आइल बा. आ लोग कहत बा कि महँगाई बा !
• रोहतास जिला डालमियानगर रेल पुल उड़ावे के योजना बेकार करत पुलिस सात गो हार्ड कोर नक्सलियन के गिरफ्तार कर लिहलसि. एकनी पर डीएसपी अखिलेश सिंह हत्याकाण्डो के आरोप बा. एकरा अलावे चुटिया थाना का जंगल से सोमार का दिने दू गो संदिग्ध नक्सलियन के गिरफ्तार कइल गइल बा.
• सिवान जिला के दुरौंदा विधानसभा क्षेत्र से चुनाइल नयकी विधायक कविता सिंह के विधानसभा अध्यक्ष उदयनारायण चौधरी सोमार का दिने शपथ धरवलें.
• राज्य के हर जिला में एगो पंचायत के सगरी गाँव में सोलर सिस्टम का माध्यम से रोशनी के व्यवस्था कइल जाई. एह खातिर हर जिला में एगो पंचायत चुनल जाई आ ओकरा हर घर के लोग से सोलर सिस्टम खरीदे के कहल जाई. सरकार एक खातिर तीस से पचास फीसदी के सबसिडी दीहि.
• पटना जंक्शन परिसर से सोमार का दिने पूर्वी चंपारण के रविरंजन नाम के आदमी के सताईस किलो चरस का साथे गिरफ्तार कर लिहल गइल.
• सारण जिला में अठाइस आ उनतीस अक्टूबर के युवा महोत्सव मनावल जाई.