बिहार के खबर

(बुध, 9 नवंबर)

• बिहार सरकार भठियरपन का खिलाफ एक डेग अउरी बढ़ गइल आ सशक्त लोकायुक्त के गठन के फैसला कर लिहलसि.
• आजु बुध से शुरु अपना सेवा यात्रा का पहिला दिने मुख्यमंत्री नीतीश कुमार पश्चिम चंपारण के बगहा में धनहा रतवल पर बनत पुल के निरीक्षण कइलन आ ओकरा के समय पर पूरा करा लेबे के निर्देश दिहलन. बगहा आ लौरिया चीनी मिल के निरीक्षण कइलन आ किसानन से ओह लोग के समस्या का बारे में बतियवलन.
• विपक्षी दल नीतीश के सेवा यात्रा के लोग के ध्यान सरकार के भठियरपन से हटावे के साजिश बतवलन
• हरिद्वार के गायत्री महायज्ञ में काल्हु मचल भगदड़ में मरे वालन के गिनिती बीस के पार हो गइल बा. एहमें बिहार के नौ आदमी शामिल बाड़े. पचरुखी सिवान के ब्रज कुमारी एही मरे वालन में शुमार बाड़ी.
• सोनपुर के हरिहर क्षेत्र में लागे वाला सोनपुर मेला के आजु बुध का दिने विधिवत उद्घाटन रमई राम कइलन. कहलन कि ई मेला बिहार के एतिहासिक धरोहर बा आ एकरा के विकसित करे के हर संभव काम सरकार करी.
• पटना आकाशवाणी से प्रसारित होखे वाला चौपाल कार्यक्रम में पहिले मगही कम्पीयर रहल पार्वती सिन्हा उर्फ गीता बहन के मंगल का दिने पटना में निधन हो गइल. ऊ साल पचहत्तर से दू हजार चार ले आकाशवाणी के आपन सेवा दिहले रही.
• रोहतास जिला आजु बुध के आपन स्थापना दिवस समारोह पूर्वक मनवलसि.
• सिवान जिला के झोपड़पुरा गाँव में आग से झउँसल एगो औरत के मौत आजु इलाज का दौरान हो गइल.
• भागलपुर जिला के कोतवाली इलाका का एगो होटल से सीआरपीएफ जवान दीपक वर्मा के लाश मिलल. बतावल जात बा कि अपना मेहरारू के खुदकुशी करे के खबर सुन के दीपको आपन जान दे दिहलन.