काल्हु वाराणसी का नियरा जयगुरू देव समागम में मचल भगदड़ में मरे वालन के गिनिती 24 हो गइल बा. प्रशासन एह हादसा के जवाबदेही आयोजकन पर आ आयोजक प्रशासन पर फेंके में लागल बाड़ें. केन्द्र सरकार का तरफ से दू दू लाख त यूपी सरकार का तरफ से पाँच पाँच लाख के अनुग्रह राशि देबे के एलान भइल बा. बाकिर हजारन करोड़ के हैसियत राखे वाला जयगुरू देव संस्था का तरफ से फूटही कौड़ियो देबे के एलान नइखे भइल. मरे वाला मर गइलें अब जे बाचल बा ओह लोग से दान पुजाई लिहला पर अधिका धेयान होखी संस्था के.
चुनाव का बाद सपा के मुख्यमंत्री चुने के मुलायम सिंह यादव के एलान पर काल्हु आजमगढ़ आइल अखिलेश यादव के कहना रहल कि नेताजी अनुभवी हईं आ जवन कहत बानी तवन ठीके होई. साथ ही अपना समर्थकन के चेतइबो कइलन कि कवनो साजिश में फँसला से सावधान रही लोग. काहे कि अबकी के चुनाव खास होखे वाला बा.
बलिया के रेवती इलाका के छेड़ी गाँव के रहे वाला जंगबहादुर सिंह कोलकाता में बिजनेस करेलें आ गाँवे उनकर मेहरारू आ छोटकी बेटी रहत रहली. छोटकी के बियाहो तय क दिहले रहलन आ सोमार का दिने ओकरा के देखे आवा वाला रहलें लईका वाला. बड़की बेटी के बियाह सहतवार में भइल बा. शुक का दिने सहतवार से एगो ड्राइवर आ के छोटकी के लिया गइल कि बड़की के तबियत खराब बा. बाकिर शनिचर का दिने छोटकी के लाश गाँवे का बधार में फेंकल मिल गइल. लाश पर धारदार हथियार से वार के निशान रहुवे. पुलिस अब मामला के तहकीकात करत बिया. एह मामिला में नवरसा के मिले वाला संपतियो के लालच हो सकेला काहें कि दुनू बहिने वारिस होखे वाला रहली अपना परिवार के.
दलालन का फेर में पड़ि के अकसर लोग झोरा छाप डाक्टरन का फेर में फँस जाला आ जब मामला बिगड़ेला त आपन छाती कूटेला. बियफे का दिने अइसने एगो मेहरारू के आपरेशन बलाया क गड़वार थाना के पकड़ी में चलत एगो नर्सिंग होम में बच्च्दानी के आपरेशन का बाद केस बिगड़ गइल. झोरा छाप डाक्टर खुदे ले जा के वाराणसी के एगो अस्पताल में भरती करा दिहलसि आ लवटि के आपन सामान समेट फरार हो गइल. ओने ओह औरत के मौत वाराणसी में हो गइल. अब फरार डाक्टर पर केस दर्ज क के ओकर तलाश होखत बा.
शनिचर का दिने बलिया जिला जेल में शहीद राजकुमार बाघ के जयन्ती मनावल गइल. एह आयोजन में सपा के विधायक आ नेता लोग शामिल रहल.
