सिनेमा भोजपुरी के चर्चित फिल्म निर्माण कंपनी मिथिला टाकिज के भोजपुरी फिल्म “राखेला शान भोजपुरिया जवान” के शूटिंग १५ मई से गुजरात के हलोल में शुरू होखे जात बा. फिल्म के निर्देशक बाड़े ढेर दिन ले पार्थो घोष के एसोसियेट रहल राजू जे पहिला बेर कवनो भोजपुरी फिलिम के निर्देशन करत बाड़े.

निर्माता मनोज चौधरी के एह फिल्म के कहानी लेखक मनोज टाइगर, गीतकार विनय बिहारी आ कैमरामेन एस. जहाँगीर हउवें. एकर एगो बड़हन खासियत होखी एकर संगीत. पहिला बेर सुपर स्टार आ लोकप्रिय गायक पवन सिंह कवनो फिलिम के संगीतकार बनल बाड़ें. फिल्म में पवन सिंह अभिनयो कइले बाड़न.

मिथिला टाकिज संगे पवन सिंह के ई तिसरकी फिलिम होखी. पहिला फिल्म गुंडई राज बॉक्स ऑफिस पर सफल रहल रहे आ दूसरकी फिलिम “डकैत” जल्दिए रिलीज होखे वाली बा.

फिल्म में पवन सिंह संगे प्रतिभा पाण्डे, बृजेश त्रिपाठी, मनोज टाइगर, दिलीप सिन्हा वगैरह के खास भूमिका बा.


(उदय भगत के रपट)

Advertisements