RajeshSinghभोजपुरी सिनेमा में एगो नया सितारा राजेश सिंह के इन्ट्री हो गइल बा. मुजफ्फरपुर के राजेश सिंह बचपने से रंगमंच से जुड़ल बाड़े. आपन प्रतिभा निखारे ला उ दिल्ली में थियेटर करे लगले. ओहिजे राजेश सिंह के पहिला बेर फिलिम में काम करे के मौका मिलल आ फिलिम रहल अमिर खान अभिनीत “1947 Earth”.

राजेश सिंह बतौर एक्टर टेलीफिल्म “दरार” कइलन. अपना कैरियर ला आ कुछ बढ़िया करे के चाहत राजेश के बेर बेर मुंबई आवे प मजबूर कइलसि बाकिर मुम्बई में उनका अपना मन के मुकाम ना मिल सकल त मुजफ्फरपुर लवटि अइलन आ एहीजे रहि के थियेटर, नाटक, एलबम, टेलीफिल्म करे लगले.

टीवी के आपन प्रेरणा स्त्रोत मानेवाला राजेश सिंह के आदर्श गोविन्दा हउवें, जिनका के देख देख के उ डांस सिखले आ फाइटो के ट्रेनिंग लिहले. एह सब में परिवारो के पूरा सहयोग मिलल.

राजेश सिंह के चाहत बा कि समाज खातिर कुछ ओइसन फिलिम करसु जवना से समाज में उनकर बढ़िया पहचान बनें. जइसन फिलिम राजश्री प्रोडक्शन के होखत रहे वइसने फिलिम से जुड़े के मौका मिलो.

राजेश अब वइसने फिलिम से आपन कैरियर शुरू करे जात बाड़े. ई उनकर पहिला भोजपुरी फिलिम ह आ अमित मुन्ना के निर्देशन में बनत बा. एह फिलिम के नाम हवे “विवाद” आ एकरा के परोसीहें नारायण बाबा.

देखल जाव कि एह फिलिम से राजेश सिंह के सपना कतना पूरा होखत बा आ उ कइसन फिलिम समाज का सोझा राखत बाड़े.


(कुन्दन राज)

[Total: 0    Average: 0/5]
Advertisements