महुआ टीवी के लोकप्रिय रियलिटी शो सुर-संग्राम-२ का मंच पर काल्हु शनिचर का दिने बालीवुड अदाकारा सोनाक्षी सिन्हा आ हॉट गर्ल मलईका अरोड़ा के भोजपुरिया लटका झटका आ ठुमका देखे के मिली. आ ओह लोग के साथ दिहन अरबाज खान. कहे के मतलब ई कि अबकी शनिचर का दिने सुर-संग्राम-२ के प्रतिभागी हिन्दी फिल्म दबंग का स्टारन का सोझा आपन गायिकी के नजारा पेश करीहें.

शुरुआत मनोज तिवारी अपना जानल बूझल अन्दाज में करीहन आ दबंग के स्टारन के मंच पर आमन्त्रित करिहन. मंच पर सोनाक्षी सिन्हा, मलईका अरोड़ा, आ अभिनेता निर्माता अरबाज खान के आगमन होखी आ उहो लोग परिचय का बाद शो के जज मालिनी अवस्थी, रविकिशन, आ कल्पना का साथे जा के बइठी.

अपना प्रस्तुति से यूपी के शुभा मिश्रा, विशाल कुमार, आ मनोहर अउर बिहार के जीतेन्द्र, ममता तिवारी आ खुशबू अपना धमाकेदार गायकी से जज लोग के दिल जीत लिहल लोग.


जीतेन्द्र के गावल गीत का बाद अरबाज खान कहले कि रउरा गाना में दबंगई देखे के मिलल त ऊ चट से जोड़ दिहन कि दबंगई त हमरा खूनो में देखे के मिली काहे कि दबंगई त हमरा खून में शामिल बा. विशाल के गावल गीत “सानिया मिर्जा के नथुनिया जान मारेला” पर मलईका पूछली कि ई गाना केकरा पर रहल हा विशाल कह दिहले कि सोनाक्षी खातिर. ममता के गावल गीत “मुखिया जी मन होखे त बोली पर जज लोग सराहल आ कहल कि एक ना एक दिन रउरा प्लेबैक सिंगर जरुर बनब.

सबकर प्रस्तुति सुनला का बाद सोनाक्षी कहली कि भोजपुरी बोल त ना पाईं बाकिर एहिजा खूब इनज्वाय कइनी. बड़ा मजा आइल सुर संग्राम के एह मंच पर आ के. कार्यक्रम के अंत कल्पना का आवाज में गावल गीत “मुन्नी बदनाम हुई डार्लिंग तेरे लिये” पर दबंग के टीम सोनाक्षी, मलईका अरोड़ा आ अरबाज खान के जम के लगावल ठुमका का साथे होई.


(स्रोत : प्रशान्त निशान्त)

Advertisements