पिछला शनिचर का दिने जब महुआ टीवी के रियलिटी शो “सुर संग्राम” के दूसरका सीजन से यूपी के प्रतिभागी मनोहर के बिदाई भइल त पता ना स्क्रिप्ट का मुताबिक आ कि अनायासे कल्पना के मुँह से निकल गइल कि उहे भइल जवन साईं बाबा टेलीफिल्म चहलें. “सुर संग्राम सीजन टू” में अब बिहार के ममता राउत के यूपी के रघुबीर से टक्कर होखी आ एह टक्कर में मैसेजे पर सब कुछ बा. मैसेज केकरा खातिर कतना आई एही पर निर्भर करी कि केकरा के ताज मिलत बा आ केकरा के संतोष.

ई बात के संदर्भ बिग बॉसो से जुड़ल बा जहाँ से पिछला हफ्ता भोजपुरी सिनेमा के मेगास्टार मनोज तिवारी आ बालीवुड के एगो साधारण कलाकार अस्मित पटेल के मुकाबिला भइल आ मनोज तिवारी के बाहर के राह देखा दिहल गइल. अन्तर अतने भइल कि ओहिजा केहू ई कहे वाला ना रहल कि उहे भइल जवन सलमान खान चहलें भा जवन बिग बॉस के प्रस्तोता चहलें. हालाँकि पता ना काहे लोग के भ्रम हो जाला कि रियलिटी शो में सबकुछ रियले रहेला !

कहल जा रहल बा कि मनोज तिवारी से कुछ लोग पहिले से खार खइले रहे जवना चलते उनका के बहरिया दिहल गइल. संदर्भ “मुन्नी बदनाम हुई” से जोड़ल जा रहल बा जवना के जानकार “लौण्डा बदनाम हुआ नसीमन तेरे खातिर” के नकल बतावत बाड़ें. “लौंडा बदनाम हुआ” गाये वाली सायराबानो फैजाबादी आजु मुफलिसी के जिनिगी जी रहल बाड़ी आ मनोज के “गलती” रहे कि ऊ “दबंग” फिल्म के निर्देशक अरबाज खान से सायराबानो फैजाबादी के कुछ मुआविजा देबे के बाति कह दिहलें. आ ओकरे बदला बिग बॉस से मनोज तिवारी के बाहर कर के लिहल गइल बा.

बिग बॉस से निकलत घरी सलमान खान कहलें कि, “अब ये देखिये मनोज तिवारी के चेहरे से उतर रहा है नकाब.” मनोज तिवारी के ई बाति तीर लेखा छाति में धँस गइल बा. कहतारें कि पता ना कवना गुनाह के नकाब उतारल गइल. सबसे खराब ई लागत बा कि अस्मित पटेल जइसन आदमी का मुकाबिले मनोज तिवारी के हारे के पड़ल. मनोज तिवारी के प्रशंसको एह बाति के पचा नइखन पावत आ कुछ लोग बिग बास के पुतलो जरावत बा.

ई बाति हम एक बेर पहिलहू कह चुकल बानी कि होइहें वही जो निर्माता निर्देशक रचि राखा.बाकि सब लोग त कठपुतली हऽ. एहमें सही गलत खोजले बेकार बा.


(स्रोत – शशिकांत सिंह)

Advertisements

1 Comment

  1. सुर-संग्राम संबंधी अपने के विचार से हम सहमत बानीं, लेकिन बिग-बॉस के बारे में कुछ भी कहल गंदगी में ढेला फेंकला जईसन बा.

This site uses Akismet to reduce spam. Learn how your comment data is processed.