कांस फिल्म फेस्टिबल में भोजपुरी फिलिम संयोग

(संयोग के ट्रेलर आ पोस्टर रिलीज करत अभिनेता राजपाल यादव)

यशी फिल्म्स का बैनर तर अभय सिन्हा के प्रस्तुत कइल पारिवारिक कहानी पर आधारित पिलिम संयोग में भोजपुरी सुपर स्टार दिनेश लाल यादव निरहुआ आ आम्रपाली दुबे मुख्य किरदार निभवले बाड़न.

दुनिया के अनेक भाषा के फिलिम अंतर्राष्ट्रीय फिलिम समारोहन में देखावल जाली सँ आ खुशी के बात बा कि अबकी भोजपुरिओ फिलिम के संजोग बन गइल आ संयोग के शामिल कर लीहल गइल.

एह मौका पर फिलिम संयोग के ट्रेलर आ पोस्टर बॉलीवुड अभिनेता राजपाल यादव रिलीज कइलन.

निर्माता अभय सिन्हा के कहना बा कि सात समुन्दर पार के एह कहानी के मिजाज पूरा तरह से भोजपुरी समाज से जुड़ल बा. उनुकर कहना बा कि एह फिलिम के कलात्मक प्रस्तुति को वजह से अंतरराष्ट्रीय फ़िल्म महोत्सव में प्रदर्शित होखे जोग मानल गइल एकरा के.

संयोग फिलिम के निर्देशल अनंजय रघुराज कइले बाड़न. फिलिम का किरदार निभावे में मुख्य अभिनेता दिनेश लाल यादव आ मुख्य अभिनेत्री आम्रपाली दुबे के साथे खास कलाकारन में संजय पांडे, अनीता रावत, संजीव मिश्रा, सूर्या द्विवेदी, जे.नीलम, आ संतोष पहलवान के नाम शामिल बा.

फिलिम के पटकथा अरबिन्द तिवारी के लिखल ह. डीओपी वासु रहलें. संगीतकार साजन मिश्रा आ शुभम तिवारी गीतकार अरबिन्द तिवारी, आशुतोष तिवारी, शेखर, आ मधुर के लिखल गीतन के संगीत से सजवले बाड़न. कोरियोग्राफी एम. ​​के. गुप्ता (जॉय) के हवे.

– रंजन सिन्हा