देश के चुनाव आ दहशत में दुनिया

भारत में हो रहल लोकसभा चुनाव 2024 के परिणाम कइसन होखी इहे सोच सोच के सगरी दुनिया दहशत में आ गइल बावे. भारत में चुनाव के व्यवस्था अइसन तगड़ा होला कि केहू थाह ना लगा पावे कि केकर आ कइसन सरकार बना जा रहल बावे. जनता के मन के थाह लगावे में देशे ना दुनियो के दिग्गज लागल बाड़ें बाकिर केहू पकिया तौर पर नइखे बता पावत कि का होखे जा रहल बा. भारत अब अइसन वैश्विक आ आर्थिक ताकत बन के उभर रहल बावे कि एहिजा के सरकार अब दुनिया के हर कोना पर असर डाले लागल बिया. एह उभरत भारत के काबू में राखे खातिर दुनिया के कई ताकत एहिजा के हिन्दू विरोधी गिरोहन के माल-पत्ता, सहारा, सहजोग दे के चाहत बाड़ी सँ कि भारत में गठजोड़ वाला अइसन सरकार बने जवना के अपना दबाव में लीहल जा सके.

जइसे जइसे चुनाव के एक एक डेग बढ़ रहल बा तइसे तइसे सभे नरभसाए लागल बा. आ जे नरभसात नइखे से पोखरा में मछरी, नौ नौ कुटिया बखरा लगावे के तइयारी करे लागल बा. देश जाय चूल्हेभाँड़ में उनुकर सरकार बने के चाही. अबहीं आखिरी दौर के चुनाव शनिचर के होखे जा रहल बा आ ओकरा पहिलहीं कांग्रेस अध्यक्ष इंडी के सभा बोला लगहले बाड़न. केहू कहत बा कि परिणाम सामने आवे से पहिले सरकार बनावे के तइयारी कर लीहल जाव. केहू चाहत बा कि अगर मनमाफिक परिणाम ना आइल त पूरा देश में आग लगावे के तइयारी कर के राखल जाव. आ एह में समय लागी से तीन दिन पहिलहीं से सूरसार शुरु कर दीहल जाव.

जे मोदी समर्थक होखी ओकरा त भरोसा होखी कि कानून व्यवस्था बिगड़े ना दी केन्द्र सरकार. हो सकेला कि भेड़िया आया, भेड़िया आया चिल्लाए वालन के सचहूं भेड़िया से सामना हो जाय आ बिना छीलल बाँस से भेंट हो जाव. बाकिर अधिका लोग त गोलबन्दी से फरका रहेला आ उनुका ई सोचिए के दबशत हो जात बा कि अगर जे कहीं …. आ देशे ना दुनिया भर के निवेशक दहशत में आ गइल बाड़ें जवना चलते भर दुनिया के शेयर बाजार में गिरावट के दौर आ गइल बा. अपना देश के शेयर बाजार आजु लगातार पाँचवा दिने गिरावट का साथे बन्द भइल बा त दुनियो के बाजार एह गिरावट से बाचल नइखे.

शनिचर केकर शनिचरा छोड़ावे जा रहल बा से त मगल का दिने सभका सोझा होखी बाकिर आजु निफ्टी के मासिक निपटानो के दिन रहुवे से – एक त कमली अपना गोर ओह पर से लीहलसि कमरी ओढ़ – वाला हालात बन गइल. एक्जिट पोल त शनिचर के होखे जा रहल आखिरी दौर का मतदान का बाद आई बाकिर सटोरिया आ निवेशक एकर तइयारी कालंहुवे से शुरु कर दिहें. से हमार अन्दाजा इहे बा कि अगर बाजार काल्हु तेजी में आइल त बूझ जाईं कि मोदी तिसरका बेर. आ अगर गिरावट के रुख धइलसि त …

काहें कि मोदी विरोधियनो के नीमना से मालूम बा कि अगर जे कही इंडी सरकार बने के नौबत आ गइल त हिन्दुवने के ना पूरा देश के रामनाम सत्य हो जाई…

हालांकि हमरा अबहियों भरोसा बा – जय श्रीराम !