सरकार बनावे के तइयारी में लागल कांग्रेस एक्जिट पोल बहस में शामिल ना होखी

आजु शुक का दिने देश के शेयर बाजार आपन रुझान बता दिहलसि कि मोदी सरकार तिसरको बार. सात डेग में हो रहल चुनाव के सतवां डेग काल्हु देश के 57 लोकसभा सीट पर होखे वाला चुनाव का बाद पूरा हो जाई. आ एकरा साथही खतम हो जाई टीवी चैनलन पर होखे वाला एक्जिट पोल पर लगावल रोक. काल्हु साँझ सात बजे से, कुछ पर त साढ़े छवे बजे से, कुकुरबझाँव शुरु हो जाई. अलग अलग सर्वे एजेन्सियन के कइल एक्जिट पोल के आंकड़ा देखावे बतावे के कोशिश करी कि जेठ के बड़का मंगल 4 जून का दिने मतगणना में बाजी केकरा हाथे लागे जा रहल बा. अलग बात बा कि एह परिणामन के विश्वसनीयता ओकरा ले बेसी नइखे होखे जा रहल जवन आजु शुक का दिने शेयर बाजार अपना रुझान में बता दिहलसि.

आजु शेयर बाजार में निवेशक अपना-अपना रुख का हिसाब से आपन पोजीशन बनावल शुरु कर दिहलन. शनिचर का दिने आवे वाला एक्जिट पोल से इशारा मिली कि उनुकर अनुमान कतना सही भा गलत हो सकेला. आ ओकरा बाद सोमार का दिने शेयर बाजार में असली उठापटक शुरु होखी.

एह बीच कांग्रेस चुनाव का बाद आपन सरकार बनावे के सपना देखे में अतना मशगूल बिया कि बता दिहलसि कि ओकर कवनो बोलतुआ कवनो टीवी चैनल का बहस में शामिल ना होखिहें. जइसे पढ़ाकू विद्यार्थी के तब ले डर बनल रहेला जब ले रिजल्ट ना निकल जाव काहे कि ओकरा हमेशा लागेला कि ओकर तइयारी ओतना बढ़िया ना रहुवे. दोसरा तरफ पढ़ाई के भसुर छात्र होलें जिनका लागेला कि उनुका सब कुछ मालूम बा आ उनुका त फर्स्ट आवहीं के बा. कांग्रेस के अपना जीत पर अतना भरोसा बा कि सोशल मीडिया पर ओकरा मंत्रीमंडल के सूची पर चरचा होखे लागल बा. एही चलते अबहीं ले राहुल गाँधी के बैंकाक यात्रा के जानकारी सोझा नइखे आइल.

एह बीच रउरो लागल होखी कि जबले कांग्रेसी प्रचारतंत्र सक्रिय बा तबले भाजपा के कवनो जरुरते नइखे कि ऊ आपन प्रचार करो. ओकर सबले बेसी प्रचार त कांग्रेसिए कइले जात बाड़ें. मोदी के साधना पर जाए वाला खबर ओतना प्रचार में ना आइत अगर कांग्रेस अपना पूरा ताकत से ओकर प्रचार ना कइले रहीत.