शूटिंग में ट्रक से लड़ल कार : घवाहिल भइलन रवि किशन

भोजपुरी सिनेमा के सदाबहार सुपर स्टार रवि किशन शनिचर का दिने भोर में बनारस में होखत हिंदी फिल्म “इसक” का शूटिंग के दौरान ट्रक चालक के लापरवाही का चलते घवाहिल हो गइलन. हालांकि अस्पताल गइला पर पता चलल कि कहीं कवनो फ्रैक्चर नइखे भइल बाकिर चोट लागल बा. मरहम नBट लागल बा. मरहम पट्टी का बाद उनुका के अस्पताल से छूट्टी मिल गइल बाकिर डाक्टर कुछ दिन आराम करे के कहले बाड़े.

रवि किशन आजुकाल्ह प्रतीक बब्बर का साथे बनारस में “इसक” के शूटिंग करत बाड़े. शनिचर का भिनसहरा ब्रिज पर शूटिंग चलत रहुवे. सीन का मुताबिक रविकिशन के इंडीवर गाड़ी आ सामने से आवत ट्रक के तय जगहा रुके के रहे. लेकिन शॉट का दौरान ट्रक के ड्राइवर समय पर ब्रेक ना लगा पवलसि आ रवि किशन की इन्डीवर गाडी के टक्कर मार दिहलसि. भिडंत काफी तेज रहल. हालात भाँपत रवि किशन निकल जाये के कोशिश कइलन बाकिर उनुका गोड़ में गंभीर चोट लागिये गइल. तत्काल डॉक्टरी मदद लिहल गइल.

दुर्घटना का बारे में बतावत रवि किशन कहलन कि एक छन खातिर त लागल कि मौत सामने आ के खाड़ बा बाकिर बाबा विश्वनाथ का कृपा से उनुका बेसी चोट ना लागल.

एह हादसा का खबर से भोजपुरी फिल्म जगत सन्न रह गइल आ सभे रविकिशन के जल्दी से ठीक हो जाये के दुआ मँगले बा.

(स्रोत – उदय भगत)