भोजपुरी सिनेमा के इतिहास में पहिला बेर चालबाज आ सीता गीता लेखा फिलिम खातिर मुँहमाँगा दाम पर हीरोइन के तलाशल जा रहल बा. आ चुने के जिम्मेदारी दिहल जा रहल बा आम आदमी के. ओकरा से बिहार आ यूपी का अखबारन में विज्ञापन दे के पूछल जाई कि रिंकू घोष, रानी चटर्जी, मोनालिसा, आ पाखी हेगडे में से केकरा के भोजपुरी सिनेमा में श्री देवी आ हेमामालिनी जइसन चालबाज भूमिका दिहल जाव.
अखबार का अलावे इंटरनेट आ फेसबुक जइसन सोशल साइटो के सहारा लिहल जाई. जवन नायिका के आम जनता के बहुमत के राय से चुनल जाई ओकरा के पहिला बेर कवनो भोजपुरी सिनेमा में नायिका के डबल रोल करे के मौका मिली. ओह नायिका के मुँहमाँगा दाम आ पैकेजो दिहल जाई. श्रीदेवी आ हेमा मालिनी जइसन ड्रीम रोल करे के मौका मिली से उपर से.
एह फिल्म के निर्माण दक्षिण के निर्माता गुड्डू रामा करीहे. गुड्डूरामा के कहना बा कि उनुकर दिली ख्वाहिश बा कि भोजपुरी में चालबाज जइसन कवनो फिलिम बनावसु बाकिर सबले बड़ दिक्कत इहे बा कि एह चुनौतीपूर्ण भूमिका खातिर केकरा के चुनल जाव. एही चलते सिनेमा दर्शकन के राय लिहल जा रहल बा. कहले कि लोग के चाहीं कि अइसन नायिका के चुनसु जेकरा में गंभीरतो होखे आ चुलबुलोपन, आ साथ ही साथ ग्लैमरो भरपूर होखे. जेकरा के लोग चुन दी ओकरा के मुँहमाँगा दाम पर साइन कइल जाई.
अब इन्तजार कइल जाव आ देखल जाव कि केकरा किस्मत में आवत बा अइसन ड्रीम रोल.
(स्रोत : शशिकान्त सिंह)
0 Comments