भोजपुरी फिल्मन के सदाबहार सुपर स्टार रवि किशन खातिर आठ जुलाई के दिन खुशियन से भरल होई काहे कि एह दिन ऊ पहिला बेर अपना धर्म पत्नी प्रीति किशन का साथे छोटका परदा पर साथ साथ नज़र अइहन, भोजपुरी मनोरंजन चैनल महुआ के चर्चित शो के बनी करोडपति के सिल्वर जुबली एपिसोड के अउरी रोचक बनावे आ ओकरा के अउरी लोकप्रिय बनावे खातिर रवि किशन के पत्नी के साथ आमंत्रित कइल गइल बा हॉट सीट पर बइठे ला.

पिछले दिने एह एपिसोड के शूटिंग कोलकाता में भइल. शो के होस्ट शत्रुघ्न सिन्हा का सोझा रविकिशन दंपत्ति अपना पारिवारिक जीवन के कुछ खुशी दर्शकन का साथे बटीहे. एह शो में ऊ साढ़े बारह लाख के इनाम जीतलन. ई पहिला मौका रहे जब रवि किशन अपना पत्नी प्रीति का साथे कवनो शो के हिस्सा बनले. हालांकि एकरा पहिले इमेजिन टीवी के शो राज़ पिछले जन्म का में प्रीति किशन दर्शक दीर्घा में अपना पति के पूर्व जन्म का राज जाने खातिर शो में शामिल रहली. लेकिन बतौर प्रतिभागी ई पहिला बेर रहल जब दुनु पति पत्नी एक साथ स्टेज पर अइले. प्रीति खातिर ई लमहा बहुते खास रहल काहे कि ऊ रवि किशन का फ़िल्मी जीवन में कबहियो कवनो दखल ना देसु. बतावल जा सकेला कि प्रीति किशन फ़िल्मी परिवेशे में पलाइल पोसाइल रहली. उनकर पिता स्वर्गीय रमण पाण्डे प्रसिद्ध फिल्म पत्रकार, प्रचारक आ फिल्म निर्माता रहले.

शो के प्रसारण महुआ टीवी पर ८ जुलाई शुक का दिने रात नौ बजे से देखावल जाई.


(स्रोत – उदय भगत)

Loading

Scroll Up