पिछला दिने महुआ टीवी के एगो डांस शो के ऑडिशन लेबे बिहार के पटना गइल भोजपुरी सिनेमा के डांसिंग क्वीन सीमा सिंह के डांस पार्टनर बने खातिर लगभग दो हजार लड़िका कंपटीशन में रहले. अब अतना अतना लड़िकन के डांस पार्टनर त बनावल ना जा सकत रहे त एगो टीमे बना दिहल गइल सीमा सिंह के साथ डांस करे ला.
ऑडिशन से निबटला का बाद सीमा सिंह अपना फिल्म ‘रंगबाज’ के प्रमोट करे पटना, मुजफ्फरपुर अउर आरा गइली, दर्शकन का साथे बइठ के रंगबाज देखली आ चाहे वालन के ऑटोग्राफो दिहली. सीमा सिंह का बारे में कहाला कि अगर फिलिम में उनुकर आयटम नंबर बा त फिलिम सुपर डुपर हिट रही. ‘रंगबाज’ फेर एह बाति के सही साबित कर देखवले बा. ‘दिवाना’, ‘सात सहेलियां’, ‘रणभूमि’, ‘लहरिया लूटऽ ए जाजा’, ‘सईंया के साथ मड़इया में’, ‘नाग नागिन’, ‘बृजवा’, ‘मार देब गोली केहू ना बोली’ वगैरह फिलिमन के मिलल सफलतो एकरे उदाहरण बा.
सीमा सिंह के आवेवाली फिलिमन में अभय सिन्हा के ‘इंसाफ’, आदित्य ओझा के ‘सुगना’, रमाकांत प्रसाद के ‘खून पसीना’, कृष्णा मिश्रा के हिंदी फिल्म ‘बीहड़’ वगैरह के नाम बा. एकरा अलावे उनुका के ‘खून पसीना’, ‘काली’, ‘धमाल कईला राजा जी’, ‘दामाद चाही फोकट में’ अउर ‘टाई’ फिल्म खातिर साइन कइल गइल बा.
हाल ही में सर्वश्रेष्ठ आयटम नंबर खातिर भोजपुरी सिटी सिने अवार्ड सीमा सिंह के दिहल गइल रहे. ऊ करीब हर निर्माता निर्देशक का फिल्म में काम करत बाड़ी आ हर आयटम नंबर पर सीमा सिंह के कड़ा मेहनत फिल्म के कामयाब बना देले.
(स्रोत – शशिकान्त सिंह)
badhiya ba e site