वइसे त फिल्मी दुनिया में रोजे कवनो ना कवनो सितारा के उदय होत रहेला बाकिर ओहमें से केहूएकेहू होखेला जे दर्शकन पर आपन गहिरा छाप छोड़ पावेला. राजीव दिनकर वइसने नयका चेहरा में से हउवन. पिछला एक महीना का भीतर उनकर दू गो फिल्म बाक्स आफिस पर दस्तक दिहलसि आ तीसरका अगिला महीना रिलीज हो रहल बा.

राजीव के पहिलका रिलीज फिल्म रहे लाट साहब. ऋतिक रोशन के काईट्स का साथे रिलीज होखला का बावजूद ई फिल्म बिहार के कई शहरन में निकहा व्यवसाय कइलसि. लाट साहब में राजीव दिनकर के किरदार एगो आवारा छात्र के रहे. उनकर दोसरका रिलीज फिलिम रहे बलिदान जवना में ऊ रविकिशन के बेटा आ छोट भाई का भूमिका में बाड़े. एह फिल्म में रविकिशन के दोहरी भूमिका बा. एह फिल्म में राजीव के अदाकारी के चहुँओर प्रशंसा हो रहल बा.

अब राजीव के जवन फिल्म रिलीज हो रहल बा ओकर नाम ह कबहू छूटे ना ई साथ. एह फिल्म में राजीव एगो आटो ड्राइवर के किरदार कइले बाड़न. आजु भोजपुरी सिनेमा के ऊ अकेला नयका स्टार बाड़े जिनका लगे बड़हन बड़हन बैनरन के आफर बा. राजीऽ दिनकर एकरा पहिले कई गो हिन्दी आ भोजपुरि फिल्मन में कोरियोग्राफर के काम कर चुकल बाड़े आ अब अभिनय का दुनिया में आपन दमदार मौजूदगी दर्ज करा दिहले बाड़न आ अब उनकर गिनती भोजपुरी सिनेमा के जमल जमावल कलाकारन में कइल जा सकेला.


(स्रोत : उदय भगत)

Advertisements

This site uses Akismet to reduce spam. Learn how your comment data is processed.