- अन्ना हजारे के अपील पर अतवार साँझ शाम उत्तर प्रदेश के कई इलाका में लोग अपना-अपना क्षेत्र के सांसद के आवास के बहरी प्रदर्शन कइल.
- महिला उत्पीड़न का खिलाफ आजु अतवार का दिने लखनऊ में बेशर्मी मोर्चा निकालल गइल.
- उत्तर प्रदेश में यमुना अतवार का फजीरे खतरा के निशान पार कर गइल.
- उत्तर प्रदेश का फिरोजाबाद में पुलिस ने एगो मरद मेहरारू के 15 गो विदेशी पिस्तौलन का साथे गिरफ्तार कइले बिया. ओकनी के हथियार तस्कर बतावल जात बा.
- उत्तर प्रदेश के मुरादाबाद जिला में पिछला 12 दिन से जारी कर्फ्यू अतवार के दिने पूरा हटा लिहल गइल.
- प्रदेश में बाढ़ के हालात बिगड़ला से सेना के सतर्क करा दिहल गइल बा. राज्य के सगरी बड़की नदी उफनाइल जात बाड़ी सँ.
- खतरा का निशान से उपर बहत गंगा से बलिया जनपद में बाढ़ के अनेसा हो गइल बा आ जिला में हाई अलर्ट घोषित हो गइल बा. कुछ दिन पहिले निचला इलाकन में घुसल बाढ़ के पानी अबहियो ओहिजे जमकल बा.
- साठ गो बीएड कॉलेजन के संबद्धता खतरा में बावे. पूर्वांचल महाविद्यालय, रानी के सराय में नया सत्र में दाखिला पर रोक लगा दिहल बा. रामझारी महाविद्यालय, जौनपुर के संबद्धता रद्द करे पर विचार होत बा.
- बसपा के सांसद रहल आनन्द सिंह आ उनुकर बेटा कीर्तिवर्धन सिंह काल्हु सपा में शामिल हो गइले. मुलायम सिंह कहले कि आनन्द सिंह के अगिला विधानसभा चुनाव में गोण्डा के गौराचौकी सीट से उम्मीदवार बनइहे.
- बरखा आ दोसरा कारण से खराब भइल सड़कन के पन्द्रह नवम्बर का पहिले मरम्मत करवा देबे के आदेश यूपी सरकार दिहले बिया.
- गाजीपुर भांवरकोल थाना के किसुनपुरा गाँव में अपना डेरा पर सूतल एगो बूढ़ के गरदन दबा के मार दिहल गइल. पुलिस जाँच करत बिया. केहू के गिरफ्तारी नइखे भइल.
- बनारस के नवापुरा में एगो कोचिंग के छत गिरला से तीन गो छात्रा घवाहिल हो गइली. संचालक के गिरफ्तार कर लिहल गइल बा.
- इंजीनियरिंग कॉलेजन में सीटो भर विद्यार्थी नइखन मिलत. अब हालत ई हो गइल बा कि बगैर डोनेशन सीधे एडमिशन करावे खातिर बोलावत बाड़ी सँ कॉलेज. कोचिंग चलावे वालन से संपर्क साधल जा रहल बा.
- मुलायमो सिंह यादव अन्ना के आन्दोलन के समर्थन कइले बाकिर कहले कि लोकपाल बिल में संशोधन खातिर सभकर राय लिहल जाव.
- मथुरा कृष्ण जन्मभूमि पर जन्माष्टमी का अवसर श्रद्धालुवन के बड़हन संख्या जुटे लागल बा. आजु रात के जन्माष्टमी मनावल जाई.
0 Comments