टटको में टटका खबर : 22 सितंबर 2014 से

बिहार आ यूपी के खबर –

• यूपी के राज्यपाल नाम नाईक कुलपतियन के समय सीमा का भितरे परीक्षा करावे, परिणाम घोषित करे आ नया सत्र शुरू करावे के निर्देश दिहले.
• इलाहाबाद उच्च न्यायालय आदेश दिहले बावे कि कंपनीबाग में कवनो तरह के व्यावसायिक भा सामाजिक समारोह ना कइल जा सके.
• बिहार के जल संसाधन मंत्री आ जदयू नेता विजय कुमार चौधरी कहलन कि सीवान से परिषद का चुनाव में भाजपा के जीत गलत तरीका से भइल बा.
• गोपालगंज के फुलवरिया इलाका के बथुआ बाजार का एगो घर में गैस सिलेंडर फटला से एगो बच्ची के मौत हो गइल आ तीन जने घवाहिल हो गइले.
• छपरा कचहरी टीसन का लगे से देशी कट्टा का साथे चार गो अपराधियन के गिरफतार कइलसि पुलिस.
• बेतिया के बलथर इलाका में ओरिया नदी का लगे सशस्त्र सीमा बल के जवान दू किलो चरस साथे एगो तस्कर के गिरफतार कइले.
• गोपालगंज माझा इलाका के हजियापुर गांव का लगे कुछ बदमाश एक आदमी के पीट पीट के मुआ दिहले.
• सीवान से परिषद चुनाव में भाजपा के जीत पर उप मुख्यमंत्री रह चुकल सुशील कुमार मोदी कहलन कि एके महीना में महागठबंधन के हवा निकल गइल बा.
• आजमगढ के रौनापार इलाका के बाढूपुरा गांव में काल्हु देर रात दिसा मैदान ला निकलल दलित नाबालिग लइकी से दू गो नवही बलात्कार कइले.
• बिहार के मंत्री रह चुकल पूर्णमासी राम से आजु फेरू पांच करोड़ रूपिया के रंगदारी मांगत जान से मार देबे के धमकी दिहल गइल.
• सीवान स्थानीय प्राधिकार से बिहार विधान परिषद खातिर भइल उप चुनाव में भाजपा के टुन्न जी पांडेय राजद आ कांग्रेस समर्थित जदयू उम्मीदवार अजय सिंह के हरा दिहले.
• बसपा के महासचिव स्वामी प्रसाद मौर्य कहले बाड़न कि लोग कवनो हिन्दू देवता खास क के गौरी गणेश के पूजा मत करसु. बसपा एकरा के उनकर निजी राय बतावतिया.

आरा, बलिया, छपरा, देवरिया, सिवान, गोपालगंज. सासाराम, रोहतास, बक्सर, कैमूर, पूर्वी चंपारण, पश्चिमी चंपारण, गाजीपुर, मऊ, गोरखपुर, चंदौली, भदोही, वाराणसी, मोतिहारी, बेतिया, जौनपुर वगैरह भोजपुरिया इलाका के खबर भोजपुरी में.

टटको में टटका खबर पढ़ीं…..