लड़की हईं लड़ सकिलें कह के राधिका प्रियंका पर तंज कसले बाड़ी का

प्रभु श्रीराम के दर्शन करे गइला का अपराध में कांग्रेस अपना मीडिया प्रवक्ता राधिका खेड़ा का साथे अइसन कइलसि कि हार पाछ के उनुका इस्तीफा देबे के पड़ गइल. कांग्रेस अध्यक्ष मल्लिकार्जुन खरगे के भेजल अपना त्यागपत्र में राधिका लिखले बाड़ी कि –

पुरनका जमाना से चलल आवत बा कि धर्म के साथ देबेवालन के विरोध होखत आइल बा, हिरनकश्यपु से ले के रावण आ कंस ले अइसने करत आइल बाड़ें धर्म के बात करे वालन का साथे.

आगे लिखले बाड़ी कि हर हिन्दू ला प्रभु श्रीराम के जनमभूमि पावनता का साथे बहुते माने राखेला. प्रभु श्रीराम के दर्शन कइल हर हिन्दू अपना जीवन के सफलता मानेला.

कहले बाड़ी कि जवना कांग्रेस के ऊ अपना जिनिगी के 22 बरीस दिहली आ एनएसयूआई से लेके कांग्रेस के मीडिया विभागो खातिर इमानदारी से काम कइली आजु ओहिजे उनुका अइसन विरोध झेले के पड़ल.

एगो वीडियो में उनुका के सुनल जा सकेला कि उनुका साथे बदसलूकी कइल गइल आ उनुका के एगो कोठरी में कुछ देर ला बंद कर दीहल गइल.

बाद में राधिका खेड़ा कांग्रेस से इस्तीफा दे दिहले बाड़ी ई कहत कि लड़की हईं लड़ सकिलें. कुछ लोग एकरा के तंज का तरह देख रहल बा प्रियंका गांधी पर जे अपना गोल में नारी पर होखत अत्याचार पर मुँह घूमा लेबेली जइसे कुछ भइले ना होखे.

आज अत्यंत पीड़ा के साथ पार्टी की प्राथमिक सदस्यता त्याग रही हूँ व अपने पद से इस्तीफ़ा दे रही हूँ।

हाँ मैं लड़की हूँ और लड़ सकती हूँ, और वही अब मैं कर रहीं हूँ।

अपने व देशवासियों के न्याय के लिए मैं निरंतर लड़ती रहूँगी। pic.twitter.com/6hjgSDcXV0

— Radhika Khera (@Radhika_Khera) May 5, 2024

जे अपने साथे हो रहल अन्याय का खिलाफ खड़ा नइखे हो पावत ओकरा से दोसरा साथे होखत अन्याय के विरोध के उमेद राखले गलत होला.

हो सकेला कि रउरो मन में सवाल आवत होखे कि राधिका खेड़ा कांग्रेस के मीडिया विभाग के अध्यक्ष पवन खेड़ा से कवनो संबंध बा का, त जाल लीं कि पवन आ राधिका का बीच कवनो पारिवारिक रिश्ता नइखे. बस दुनू का नाम में खेड़ा लागल बा.