- यूपी राज्यपाल काल्हु सोमार का दिने आपन तीन महीना के कार्यकाल के रिपोर्टकार्ड पेश कर के एगो नया परंपरा के शुरूआत करीहें.
- बिहार के स्वास्थ्य मंत्री रामधनी सिंह राजद के नेता रघुवंश प्रसाद सिंह के भेड़ बकरी जस बतावत कहलन कि कवनो भेड़ बकरी का कहला प इस्तीफा ना दीहें.
- आजमगढ के जहानागंज इलाका से एगो नाबालिग लडकी के अपहरण करे के आरोप में पुलिस आजु एगो आरोपी के गिरफ्तार क के जेल भेज दिहलसि.
- पूर्वांचल विश्वविद्यालय के पहिलका उपकुलपति आ सेवानिवृत आईएएस अधिकारी हरिमूर्ति सिंह के आजु 90 साल का उमिर में लखनऊ में निधन हो गइल.
- वाराणसी के काशी विश्वनाथ मंदिर का लगे के माता अन्नपूर्णा देवी के मंदिर के पुजारी गणपति झा पर एगो औरत छेडखानी के आरोप लगवले बिया. मंदिर के कार्यपालक अधिकारी अजयकुमार अवस्थी के तहरीर पर चौक थाना में केस दर्ज भइल बा.
- रोहतास जिला के नगर थाना के बैरिया मोड़ का लगे तैनात एगो दारोगा के उगाही करत पकड़इला का बाद निलंबित कर दिहल गइल आजु.
- मऊ जिला में आज दू गो हादसा में एगो औरत समेत दू लोग के मौत हो गइल.
- गोंडा के कटरा बाजार इलाका में रास्ता निकाले खातिर भइल झगड़ा में एगो दलित के पीट पीट के मुआ दिहल लोग.
- राम जन्मभूमि न्यास के अध्यक्ष मंहत नृत्य गोपाल दास आजु अयोध्या में कहलन कि केन्द्र क नरेन्द्र मोदी सरकार के राम मंदिर बनवावे ला दू साल के समय दिहल गइल बा. एह बीच ना बन पावल त फेरू आन्दोलन शुरू कइल जाई.
- देवरिया जिला के बनकटा इलाका में जमीन का झगड़ा में भइल मारपीट से आठ लोग घवाहिल भइले.
- मऊ जिला के घोसी इलाका में काल्हु देर रात पुलिस दू गो तस्करन के पांच किलो गांजा संगे गिरफ्तार कर लिहलसि.
0 Comments