- बुध का सबेरे नौसेना के पनडुब्बी आईएनएस सिंधुरत्न में हादसा भइला से सात गो नौसेनिक घवाहिल हो गइले आ दू गो के पता नइखे चलत कि कहाँ गइलें. हादसा का बेरा पनडुब्बी पानी का भीतर रहुवे. एने नौसेना में लगातार होखत हादसा पर रक्षा मंत्री के नाराजगी जतवला का बाद नौसेना प्रमुख एडमिरल डी. के. जोशी बुध का दिने नैतिक जिम्मेदारी लेत आपन इस्तीफा दे दिहलन.
- अपना महतारी के बीमारी का नाम पर सुप्रीम कोर्ट में हाजिर ना होखे वाला सहारा प्रमुख सुब्रत राय का खिलाफ सुप्रीम कोर्ट गैर जमानती वारंट जारी क दिहलसि आ चार मार्च के उनुका के अदालत में हाजिर होखे के फरमान सुना दिहलसि.
- नरेन्द्र मोदी के नपुंसक कहे वाला विदेश मंत्री सलमान खुर्शीद से माफी मांगे के कहलसि. हालांकि अपना बदजुबानी का बादो सलमान खुर्शीद अड़ल बाड़े कि उ सही बात कहले.
- दूध वाला उजर क्रांति आ फसल वाला हरियर क्रांति का बाद अब देश में उर्जा वाला केसरिया क्रांति के जरूरत बतवले नरेन्द्र मोदी. कहले कि उर्जा में खुदराज होखला का बादे देश के बढ़न्ती होखी.
- केजरीवाल बुध का दिने एक बेर फेरू कहलन कि आआपा अपना कवनो विधायक के लोकसभा चुनाव के टिकट ना दी. बाकिर खुद केजरीवाल लोकसभा के चुनाव लड़ीहें कि ना आ लड़ीहें त कइसे लड़ीहें से ना बतवलन जबकि उहो विधायक हउवन.
- 64वां राष्ट्रीय बास्केटबॉल चैम्पियनशिप में बुध का दिने पुरुष वर्ग में पंजाब, उत्तर प्रदेश, हरियाणा, झारखंड, सर्विसेज, मध्य प्रदेश अउर उत्तराखंड आ महिला वर्ग में रेलवे, आंध्र प्रदेश, पंजाब, राजस्थान, तमिलनाडु, बिहार अउर उत्तर प्रदेश अपना जीत से शुरूआत कइले.
0 Comments