पटना 30 अक्तूबर (वार्ता) बिहार के उपमुख्यमंत्री रहल आ भाजपा: के बड़ नेता सुशील कुमार मोदी आरोप लगवलन कि बिहार के मुख्यमंत्री नीतीश कुमार नरेन्द्र मोदी से निजी दुश्मनी आ जरतवाही का चलते राज्य के लाखो लोग के जान खतरा मे डाल दिहलन.
सुशील मोदी आरोप लगवलन कि हुंकार रैली मे जानबूझ के सुरक्षा के पर्याप्त इंतजाम ना कइल गइल. एह ला नीतीश के जनता से माफी माँगे के चाहीं. कहलन कि नरेन्द्र मोदी के बढ़त प्रभाव से परेशान आ चिंतित नीतीश कुमार बचकानी टिप्पणी करत बाड़न.
सुशील मोदी कहलन कि मुख्यमंत्री राजगीर के अपना डेढ़ घंटा के भाषण मे ई उचित ना समुझलन कि आतंकियन के बम विस्फोट मे शहीद छह लोग ला दू मिनट के मौन राख के श्रद्धांजली दे देसु. कहलन कि हमला पूरा बिहार के खिलाफ रहे आ जे मराइल भा घायल भइल ओह लोग ला नरेन्द्र मोदी के चिंतित होखल स्वाभाविक बा.
सुशील मोदी कहलन कि जदयू के चिंतन शिविर मे त पार्टी के प्रतिनिधियनो ले अधिका पुलिसकर्मी तैनात रहले बाकिर हुंकार रैली में एगो मेटल डिटेक्टर ले ना लगवावल गइल, कवनो तरह के निगरानी के इंतजाम ना रहे आ मैदान के जाँच पड़ताल ले ना भइल. जबकि सरकार के केन्द्र पहिलही सचेत क दिहले रहुवे.
पुछलन कि मुख्यमंत्री के बतावे के चाही कि आखिर जब आतंकी यासीन भटकल पकड़ाइल त बिहार पुलिस ओकरा के हिरासत मे लेबे खातिर तइयार काहे ना भइल. इहो बतावे के चाहीं कि इंडियन मुजाहिद्दीन के जड़ बिहार मे गहिर काहे आ कइसे होखल जात बा आ सरकार आतंकियन प नरम काहे बिया.
0 Comments