कहे खातिर सभे केहू आपन, आपन कहाए वाला के बा

मुलायम सिंह यादव के पारिवारिक बाकिर समाजवादी नाम से जानल जाए वाला गोल सपा में गुटबाजी के कवनो सीमा नइखे लउकत. कहे खातिर सभे केहू आपन, आपन कहाए वाला के बा, जइसन हाल हो गइल बा सपा में अखिलेश यादव के. जवन नेता चाचा शिवपाल सिंह यादव से लड़ाई में अखिलेश का साथे लउकले ओह लोगन के सपा से निकाल बाहर क दीहलन चाचा शिवपाल सिंह यादव आ भतीजा अखिलेश यादव के मन मसोस के रह जाए पड़ल बा.

आजु फेरू एलान हो गइल कि मुख्तार अंसारी के गोल कौमी एकता दल के सपा में मिला लीहल गइल बा. शिवपाल सिंह यादव के हाथ में खेलेला मजबूर हो गइल मुलायम सिंह यादव एकरा पर आपन सहमति दे दीहले बतावल जात बाड़ें. शिवपाल सिंह यादव त इहो कहत बाड़ें कि अखिलेशो एह से सहमत बाड़ें. बाकिर सभे जानत बा कि पिछला बेर जब एह बाति के एलान भइल रहुवे त अखिलेश भड़क गइल रहलन. अब दुबारा फेरू कौमी एकता दल के सपा में मिला लेबे के एलान भइल बा बाकिर अखिलेश खुल के कुछ नइखन कहि सकत.

कहे वाला त इहो कहत बाड़ें कि बाप बेटा के मन मुटाव अतना बढ़ गइल बा कि एह नवरात में अखिलेश अलगा रहल शुरू क दीहें. अबहीं ले ऊ मुलायम सिंह के ओह आवास में उनुका साथही रहत रहलन जवन पूर्व मुख्यमंत्री होखला का चलते आवंटित भइल रहुवे. अखिलेश यादव मुलायम सिंह यादव के पहिलका मेहरारू से बेटा हउवन.