वाराणसी 19 दिसम्बर (वार्ता) भाजपा के प्रधानमंत्री पद के दावेदार नरेन्द्र के वाराणसी में होखे वाला रैली से पहिले बाबा विश्वनाथ आ संकटमोचन मन्दिर जाए के कार्यक्रम प्रशासन के कपरबथी बन गइल बा आ एकरा के टारे के हरसंभव कोशिश करत बावे प्रशासन.
प्रशासन के कहना बा कि वाराणसी सकेता वाला गलियन के शहर ह आ एहिजा जाम रोजमर्रा के समस्या ह. एहसे मोदी के अपना विश्वनाथ मंदिर आ संकटमोचन मन्दिर जाए के योजना पर बढ़िया से सोचे के चाहीं. प्रशासन चाहत बिया कि मोदी कवनो दोसरा दिने आ के दर्शन पूजन करसु.
बाकि अगर मोदी के कार्यक्रम में बदलाव ना भइल त प्रशासन एकर पूरा इंतजाम करवइबे करी. दुनू मंदिर का इर्द गिर्द सुरक्षा बढ़ा दीहल गइल बा.
असल में नरेन्द्र मोदी पर बेर बेर भाजपा के अयोध्या जइसन मूल मुद्दन से बचे के आरोप लगावल जात बा. पिछला दिने जम्मू कश्मीर के बारे में धारा 370 पर बहस के मांग से एह बात के अउरी हवा लाग गइल. अब एही आरोपन के हवा निकाले खातिर मोदी बाबा विश्वनाथ मदिर आ संकटमोचन मन्दिर जाए के फैसला कइले बाड़न.
विहिप हमेशा से विश्वनाथ मंदिर से सटल ज्ञानवापी मस्जिद पर दावा ठोकत आइल बावे. एह चलते विश्वनाथ मंदिर इलाका बहुते संवेदनशील बन गइल बा ओकर सुरक्षा व्यवस्था अयोध्या के रामजन्म भूमि मंदिर जइसने होखेला.
रैली वाली जगहा पर स्थानीय पुलिस के मदद ला दू गो अपर पुलिस अधीक्षक, सात गो उपाधीक्षक, 25 गो निरीक्षक, 25 गो महिला उपनिरीक्षक, 12 कम्पनी पीएसी आ एक कंपनी आरएएफ के तैनाती कइल गइल बा. साथही सुरक्षा मे बम डिस्पोजल दस्ता आ एटीएस के कमाण्डोओ तैनात रहीहें.
0 Comments