– नीरज सिंह
1) माफीनामा
बहुत दिन के बाद अइला प
कतना बुझल बूझल लागत बा
कहिए से बंद
हमार गांव वाला घर !
लागऽता जइसे
कवनो बच्चा होखे
अपना माई से रूसल
भा जइसे माइए होखस
देर से घरे आइल अपना बेटा से
खिसिआइल ।
घर के बाहर के दिवारन प
पसरल लतर बढ़ियाइल बाड़ी स
बेपरमान
अंगना में उगि आइल बाड़ी स
तरह तरह के घास
पौध सूखि गइला के चलते उदास बाटे
तुलसी चौरा
सुखा गइल बा चापाकल
पसरल बा एगो डेरवावन सन्नाटा ।
ओसारा के देवाल पर
धूरि गरदा से धुंधुआइल
बाटे माई के फोटो
पोछला प चमके लागल बा
माई के चेहरा –
‘‘ आइल बाड़ऽ बबुआ !
नीमन बाड़ऽ नू सपरिवार ?
बबुआ कइसन बाड़न स ?
अबहीं पढ़ते बाड़न स कि
नोकरी चाकरी धइलन स कतहीं ?
आ बड़की बुचिया कइसन बिया हो ?
बड़ी मयगर रहे
आवत रहे त हमरा के छोड़ के तहरा लोग संगे
जाए के नाम ना लेत रहे !
ओकर मन लाग जात रहे एहिजा ।
ओसही जइसे हमार मन गड़ा गइल रहे
एह अंगना के माटी में ।
कहाँ गइनी हम तहरा लोग संगे कबहीं कतहूं !
रटते रह गइल लोग सभ भाई
बाकिर हम अपना ससुर के
बनवावल घर छोड़ के कहां जइतीं बचवा !
कइसे जइतीं हो
घर में संझवत के देखाइत बबुआ ? ‘‘
मन में आवऽता
पूछीं कि तहरा चल गइला के बाद
अब के देखावत बाटे संझवत के दिया
ए माई ?
जब ले जियलू
घर अगोरे के चलते
दूर रहलू हमनी से
ना अपने सुख से रहलू
ना हमनिए के अपराधबोध से मुक्त होके रहे देलू
कबहीं!
जइसे अबले करत रहलू क्षमा
तसहीं अब हमेशा
खातिर कर दीहऽ
माफ ए माई
काहे कि
दिया देखावे के नाम प
हम आइल बानी सउँपे घर के चाभी
हमेशा हमेशा खातिर
छोटका चाचा के
माफ करिहऽ ए माई !
माफ करिहऽ !
2) पकवा इनार
पकवा इनार प के खेत
हमरा परिवार के शान रहे ।
बाबा कहत रहन हमरा से
लड़िकाईं में
जानत बाड़ऽ बबुआ
सिपाही के नोकरी से
रिटायर अइनी त
सब जमापूंजी
लगाके किनले रहीं इहे
डेढ़ बिगहवा खेत ।
किनले रहीं इ बरियार नाभ धरती
आ हल्ला भ गइल रहे
चारो ओरिया गांव-जवार में
‘बड़ नू कमाई क के पिनसिन आइल बा
ईश्वरसिंघवा !
बड़का घरायन के लोग
देखते रह गइल आ
लिखवा लेलस पराहुत राय के
डेढ़ बिगहवा पकवा इनार।
एकरे के कहल जाला मरदाही रे भाई ।’
बाबा मुअलन आ
तीसरे साले नू रेहन धरा गइल डेढ़ बिगहवा !
धराइल रहे दिन दिदिया के
बियाह के
आ ओने बलेसर काका
कोड़ मरलन भोरे भोरे दुआर -’
तनिको घबड़इह जन भतीजा !
जइसे हिम्मत करके ठीक कइले बाड़ऽ
राजा घरे बेटी के बियाह
तसहीं करेजा चीर के देखा देबे के बा
बबुआनी
अपना जवार के‘ !
फेर का !
खूब जमके देखावल गइल
बबुआनी आ
अगिला साले चले लगलन स
बलेसर काका के
एक जोड़ा हर
डेढ़ बिगहवा के छाती प ।
तब से बहुत कोशिश कइलन बाबूजी
बकिर काहे के !
डेढ़ बिगहवा जहां रहे, तहें रह गइल ।
सूचनार्थ निवेदन बा
कि बाबूजी अब नइखन एह दुनिया में
हमनी के कुल्ह भाई बड़ले बानी जा
एही दुनिया में
आ साँच कहीं त नाहियो बानी जा ।
भरपूर कोशिश हो रहल बा
लइकन के नीमन पढ़ाई करावे के
नाम प
पकवा इनार प के
डेढ़ बिगहवा से जान छोड़ावे के ।
– वीर कुंवर सिंह नगर, कतिरा, आरा – 802301
(पाती के दिसम्बर 2022 अंक से साभार)
0 Comments