राजनीति में नीचतई आ कि नीचतई में राजनीति – बतंगड़ 65

by | Dec 25, 2017 | 0 comments

– ओ. पी. सिंह

राजनीति में नीचतई के कवनो सीमा ना होखे. आ दिन प दिन ई अउरी नीचे गिरल जात बा. गुजरात के चुनाव कांग्रेस आ भाजपा का बीच में नाक के लड़ाई बनि गइल बा. हज का भरोसे निकलल कांग्रेस मुतमइन रहुवे कि अबकी गुजरात में ओकर सरकार बनि जाई आ बबुआ के ताजपोशी का बाद ई उनुका ला सबले बड़का उपहार हो जाई आ उनुकर तुतुही दुनिया भर में बाजे लागी. बाकी जस-जस दिन आगे बढ़ल तस-तस कांग्रेस का बुझाए लागल कि ई सिरफल फोड़ल ओकरा बेंवत में नइखे.
राम जी के होखले से इन्कार करे वाला कांग्रेसी खानदान तब अपना के जनेऊधारी बरहमन साबित करे में लाग गइल. एने मन्दिरे-मन्दिर मूड़ी पटकत चलत बबुए के गोल के एगो बड़हन नेता आ वकील कपिल सिब्बल सुप्रीम कोर्ट में माँग क दिहलन कि जबले 2019 के भोट नइखे हो जात तब ले राम मन्दिर के मसला पर कोर्ट कवनो सुनवाई मत शुरु करे. ओने अहमद पटेल के मुख्यमंत्री बनावे के लालच देत कांग्रेस मुसलमान गोलबन्दी शुरु क दिहलसि. पाकिस्तानी सेना खुल के कांग्रेस, राहुल आ अहमद पटेल के तरफदारी करे लागल कि अगर मोदी के हरावे के बा त हिन्दुवन के एका तूड़ल बहुते जरुरी बा. योजना त पहिलहीं से बनल रहल बाकिर खुलासा अब जा के भइल बा.
हिन्दुवन के एका तूड़े ला कांग्रेस हज के सहारा ले लीहलसि. अब ई हज ऊ हज ना ह. हार्दिक, अल्पेश आ जिग्नेश के नामन के पहिला अक्षर मिला के बनल मंत्र ह ई हज जवना भरोसे कांग्रेस गुजरात के वैतरणी पार करे के सपना देखले रहुवे. एहिबीच पहिला दौर के भोटिंग का ठीक पहिले मणिसंकर अय्यर एगो धमाका क दिहलन. नरेन्द्र मोदी ला सोनिया आ प्रियंका का बाद इहो नीच शब्द के इस्तेमाल क दिहलन आ मोदी का साथही उनुकर पूरा गोल लपकि लिहलसि एह नीचतई के. कांग्रेस के सन्निपात जस हो गइल आ आनन-फानन में मणिसंकर के कांग्रेस से निलम्बित क दीहल गइल.
राजनीति के जवन नीचतई प मणिसंकर उतरलन तवन कवनो पहिला बेर के बाति ना ह. एहसे पहिलहूं ई शख्स मोदी ला तरह-तरह के अपशब्दन के इस्तेमाल क चुकल बा बाकिर एक्शन पहिला बेर लीहल गइल बा ओकरा खिलाफ. एहसे एकरा पाछा के मरम जानल जरुरी बा. राजनीति में कबहूं कवनो बाति सोझ ना होखे. कहीं प निगाहें कहीं प निशाना राजनीति में आए दिन होखत रहेला. मणिसंकर कांग्रेस के प्रचार समूह के सदस्य हउवन आ ई सोचल गलत होखी कि ऊ बिना सोचले समुझले अइसन काम क जइहें जवना से कांग्रेस के नुकसान हो जाव.
असल में ई सबकुछ कांग्रेसी रणनीति के स्क्रिप्ट का हिसाबे से हो रहल बा. पहिले त हज के सहारा ले के हिन्दुवन के एका तूड़े के कोशिश भइल. फेर ईसाई आर्कबिशप से राष्ट्रवादियन के हरवावे के गोहार लगवावल गइल. राहुल के जनेऊधारी बरहमन होखल जान के मुसलमान बिदकसि जनि एह ला कपिल सिब्बल से राम मन्दिर के विरोध करवावल गइल. बाकिर हर चाल उलटा पड़त देखि के आखिर में राहुल के छवि बचावे ला ब्रह्मास्त्र का रुप में मणिसंकर के बयानबान चलवा दिहलसि कांग्रेस. काहे कि ओकरा मालूम हो गइल बा कि अगिला अतवार का दिने 18 तारीख के जब भोट गिनाई त कांग्रेस के हारल पकिया बा. एह हार से राहुल के प्रेसिडेन्सी प आँच मत आवे एहला मणिसंकर अब सभका निशाना प आ जइहन. मणिसंकर के कांग्रेसी भक्ति प कवनो शंका कइला के जरुरत नइखे. अपना मालिक-मलिकिनी ला ऊ कवनो नीचतई क सकेलें आ आपन बलिदानो दे सकेलें.
हालांकि कुछ लोग एह राय से सहमत नाहियो होखी. काहें कि ओह लोग के राय बा कि राहुल के ताजपोशी से निराश होके कपिल सिब्बल, शशि थरुर, चिदम्बरम, मणिसंकर वगैरह भितरघाती लोग कांग्रेस के बरबाद करे प आ गइल बा. खैर असल खेल जवन होखे हमहन के खुश होखे के चाहीं कि आखिरकार गान्ही बाबा के कहल सही साबित होखे का कगार प आ गइल बा. आजादी का बाद ऊ चहले रहलें कि कांग्रेस के विघटित क दीहल जाय.
(कोलकाता के हिन्दी दैनिक समज्ञा में पिछला अतवार 10 दिसम्बर का दिने अँजोर भइल.)

Loading

0 Comments

Submit a Comment

This site uses Akismet to reduce spam. Learn how your comment data is processed.

अँजोरिया के भामाशाह

अगर चाहत बानी कि अँजोरिया जीयत रहे आ मजबूती से खड़ा रह सके त कम से कम 11 रुपिया के सहयोग कर के एकरा के वित्तीय संसाधन उपलब्ध कराईं. यूपीआई पहचान हवे - भा सहयोग भेजला का बाद आपन एगो फोटो आ परिचय
anjoria@outlook.com
पर भेज दीं. सभकर नाम शामिल रही सूची में बाकिर सबले बड़का पाँच गो भामाशाहन के एहिजा पहिला पन्ना पर जगहा दीहल जाई.
अबहीं ले 13 गो भामाशाहन से कुल मिला के सात हजार तीन सौ अठासी रुपिया (7388/-) के सहयोग मिलल बा. सहजोग राशि आ तारीख का क्रम से पाँच गो सर्वश्रेष्ठ भामाशाह -
(1)
अनुपलब्ध
18 जून 2023
गुमनाम भाई जी,
सहयोग राशि - एगारह सौ रुपिया

(3)

24 जून 2023 दयाशंकर तिवारी जी,
सहयोग राशि - एगारह सौ एक रुपिया
(4)
18 जुलाई 2023
फ्रेंड्स कम्प्यूटर, बलिया
सहयोग राशि - एगारह सौ रुपिया
(7)
19 नवम्बर 2023
पाती प्रकाशन का ओर से, आकांक्षा द्विवेदी, मुम्बई
सहयोग राशि - एगारह सौ रुपिया

(11)
24 अप्रैल 2024
सौरभ पाण्डेय जी
सहयोग राशि - एगारह सौ रुपिया

पूरा सूची
एगो निहोरा बा कि जब सहयोग करीं त ओकर सूचना जरुर दे दीं. एही चलते तीन दिन बाद एकरा के जोड़नी ह जब खाता देखला पर पता चलल ह.

संस्तुति

हेल्थ इन्श्योरेंस करे वाला संस्था बहुते बाड़ी सँ बाकिर स्टार हेल्थ एह मामिला में लाजवाब बा, ई हम अपना निजी अनुभव से बतावतानी. अधिका जानकारी ला स्टार हेल्थ से संपर्क करीं.
शेयर ट्रेडिंग करे वालन खातिर सबले जरुरी साधन चार्ट खातिर ट्रेडिंगव्यू
शेयर में डे ट्रेडिंग करे वालन खातिर सबले बढ़िया ब्रोकर आदित्य बिरला मनी
हर शेेयर ट्रेेडर वणिक हैै - WANIK.IN

Categories

चुटपुटिहा

सुतला मे, जगला में, चेत में, अचेत में। बारी, फुलवारी में, चँवर, कुरखेत में। घूमे जाला कतहीं लवटि आवे सँझिया, चोरवा के मन बसे ककड़ी के खेत में। - संगीत सुभाष के ह्वाट्सअप से


अउरी पढ़ीं
Scroll Up