नया बाल-गीत के कमी दूर कइली अक्षरा सिंह अपना हँसी के खजाना से

भोजपुरी संगीत आ गीत-गवनई में बड़हन नाम बन चुकल वर्ल्डवाइड रिकॉर्ड्स भोजपुरी के यूट्यूब चैनल पर अक्षरा सिंह के गावल एगो गाना सुन के मन खुश हो गइल.

गाना हवे ‘हंसी के खजाना’ आ बचवन खातिर रचल एह गाना के मास्टरनी बनल अक्षरा सिंह स्कूल में गा के बचवन के सिखावत बाड़ी. फूहड़ लोग भोजपुरी में फूहड़पन के ओरहन ले के त खुब फेंकरेला बाकिर कवनो नीमन गीत जवना के सगरी परिवार का साथे सुनल जा सके भा जवना के अपना दुलरुवा बचवन के सुनावल जा सके ओकर चरचा ना करे.

हम जब ई गीत सुननी त एकरा के आजु भोजपुरी में दुनिया के पहिलका वेबसाइट, 21वां साल चलत बा अंजोरिया के, पर रउरा साथे मिल बाँटे के तय कर लिहनी. रउरा एकरा के पढ़त बानी त एकर मतलबे बा कि रउरा भोजपुरिया हईं आ भोजपुरी में कुछ पढ़े सुने एहिजा आइल बानी. अतना त रउरा करिए सकिलें कि एह पोस्ट के अपना फेसबुक, इंस्टाग्राम, ट्वीटर भा ह्वाट्सएप पर शेयर कर दीं. हो सकेला कि कुछ अउर लोग अंजोरिया का बारे में जान जाव. अगर रउऱा भोजपुरी खातिर कइल अंजोरिया के प्रयास के सहायता कइल चाहत बानी आ कुछ आर्थिक सहजोग कर सकीलें त बगल में दीहल लिंक पर भेज सकीलें.

अक्षरा सिंह पर फिल्मावल गइल एह गीत के गवले बाड़ी गायिका ममता राउत. इहो सुरसंग्राम से भोजपुरी के गीत-गवनई में एगो जानल मानल बन गइल बाड़ी.

अइसन बढ़िया गाना लिखे खातिर गीतकार फणीन्द्र राव के हजार बेर अभिवादन. भोजपुरी का खजाना में एह तरह के गीतन के बहुत जरुरत बा –
हंसी के खजाना लेके आइल बानी,
तोहनी के पसंन के सुनाईब हम कहानी.
त बच्चा लोग के के सुनी…

सबले बड़ खुशी के बाति इहो बा कि एकरा के भोजपुरी फिलिम ‘अक्षरा’ में शामिल कइल गइल बा. फिलिम अक्षरा वर्ल्डवाइड चैनल आ सबरंग फिल्म प्रोडक्शंस के परोसल ह. एकर निर्माता हउवन कुलदीप श्रीवास्तव अउर रत्नाकर कुमार, निर्देशक देव पांडेय, पटकथा लेखक राकेश त्रिपाठी, संगीतकार ओम झा, गीतकार प्यारे लाल यादव ‘कवि जी’, सभा वर्मा, फनिदर राव अउर राकेश निराला, छायाकार जगविंदर सिंह हुंदल, क्रिएटिव डायरेक्टर कन्हैया एस.विश्वकर्मा आ वीएफएक्स फरहान जादा, एक्जेक्यूटिव निर्माता राजेश सिरसात अउर अखिलेश राय हउवें. कला निर्देशन राम बाबू ठाकुर के, नृत्य निर्देशन कानू मुखर्जी, आ एक्शन मास्टर प्रदीप खड़का हउवें.

फ़िल्म अक्षरा के कलाकारन में अक्षरा सिंह, अंशुमान मिश्रा, धानी गुप्ता, विनोद मिश्रा, अनुप अरोरा, विनीत विशाल, जे.नीलम, मटरू, बीना पांडेय, शुभकिशन शुक्ला, प्रतिभा साहू, ललित उपाध्याय, विद्या सिंह, सीपी भट्ट, संजीव मिश्रा, अखिलेश शुक्ला, संजू सोलंकी, रिंकी शुक्ला, आर.नरेंद्र, आर्यन विश्वकर्मा, कानू मुखर्जी, सोनू सनम माही, कन्हिया एस.विश्वकर्मा, सौरव चौधरी, सनाया गुप्ता, रितिका सिंह, पप्पू खान, एचआरपी बाबू, चंचल त्रिपाठी, आ सतीश यादव के नाम खास बा.

चलीँ अब गाना सुनीं त पार लागे त बताईं कि रउरा कइसन लागल –