जेकर जतना गिनिती भारी ओकर ओतना हिस्सेदारी के नारा लगावत राहुल गाँधी से केहू पुछे कि तब त देश में हिन्दुवन के राज होखे के चाहीं. त ऊ का बतइहें से त नइखे मालूम बाकिर हिन्दूवने के काट करे खातिर ई जाति वाला दाँव चलवले बाड़ें देश के विपक्षी गोल. ओह लोग के सबले बड़ चिन्ता आजु इहे बा कि कइसे हिन्दुवन के अपने में लड़वा के राखल जाव.
अब जब जाति के गिनिती करा के हल्ला मचावल जात बा कि देश में पिछड़ा आ अतिपिछड़ा कुल मिला के 63 फीसदी आबादी बाड़ें. एह हिसाब से देश पर पिछड़न आ अतिपिछड़ने के राज चले के चाहीं. अब केहू एह लोग से ई मत पूछे कि बिहार में त कई युग से पिछड़े के राज चलत बा. जगन्नाथ मिसिर का बाद त कवनो अगड़ा सीएम के कुरसी पर बइठबे ना कइल. त फेर अतिपिछड़ा अतिपिछड़े काहें रहि गइलें. सतरह बरीस के यादव राज में कबो कवनो दोसरो जाति के चलल का ?
हो सकेला कि रउरा लोग के आजु के लेख के मथैला मथत होखे कि विमर्श के स्तर अतना नीचे ना गिरावे के चाहीं. बाकिर आजु के राजनीति जवना स्तर ले आ गइल बावे, मीडिया में कुकुरबझाँव के जवन दौर चलत बा, ओह दौर में सभ्यता आ शालीनता के कामना कइले फूहड़ कहाई.
त आईं लवटल जाव विषय पर. बिहार के जाति आधारित सर्वेक्षण के रिपोर्ट अइला का बाद से सगरी मीडिया हलकान बा जाति के एह आझुराव के सझुरावे में. तरह-तरह के सर्वे थाह लगावत बाड़ें कि देश के पिछड़ा वर्ग केकरा के आपन नेता बनावल चाहत बा. एगो चैनल पर सुननी हँ कि 61 फीसदी पिछड़ा (एहमें अतिपिछड़ो शामिल बाड़ें शायद) आजुवो नरेन्दरे मोदी के अगिला पीएम का कुरसी पर देखल चाहत बाड़ें.
हमरा उहो जमाना इयाद बा जब इमरजेन्सी का दौर में दूरदर्शन पर बाल भारती के एगो कार्यक्रम देखावल जात रहुवे. एहसे ना कि इन्दिरा गाँधी सरकार अभिव्यक्ति के आजादी के पक्षधर रहुवे. बलुक एह चलते कि उनुका सरकार के मालूमे ना रहल कि बाल भारती संघ के एगो आनुषांगिक संगठन हवे.
संघ के तरकस में हर तरह के तीर रहेला. कब कवना मौका पर कवना तीर के इस्तेमाल करे के बा ई ओकरा बहुते बढ़िया से मालूम रहेला. बरीसन का मेहनत का बाद ओकर परिणाम जब सामने वाला तब लोग चिहा जाला. के सोचले होखी कि त्रिपुरा के बँवारा गिरोह के सरकार के आसानी से गिरा के भाजपा दू तिहाई बहुमत से सरकार बना ली.
के सोचले रहल कि जम्मू कश्मीर से धारा 370 आ 35ए के अतना सहजता से हटावल जा सकेला. अगर केहू सोचत होखे कि महिना दू महीना में एकर प्लान बना लीहल गइल होखी त ओकरे बुद्धि पर तरस खाए के पड़ी. एकर योजना त ओकरो पहिले से शुरु हो गइल रहल होखी जब भाजपा महबूबा मुफ्ती का साथे मिल के सरकार बनवले रहुवे. दोसरे लोग ना संघ के समर्थको तब एह गठबन्हन का खिलाफ रहलें. बाकिर ओकर परिणाम कतना बढ़िया निकलल देश खातिर.
याद करीं उहो दिन जब पूरा देश में गणेश जी दूध पिए लागल रहलें. एकरा पीछे के रहल, का योजना रहल, काहे रहल वगैरह के जबाब खोजे के जहमत उठावे के जरुरत नइखे. एक बेर इहो देख लीं कि आखिर ऊ के लोग हवे जे दुनिया भर में एक एक करके देश के दुश्मनन के टपकवले जात बाड़ेंं.
बाति ढेर लमहर खींचाव ओकरा पहिले इहो जान लीं कि देश के राजनीति पर गँवे-गँवे बहुसंख्यके लोग – पिछड़ा आ अतिपिछड़ा – बइठ गइल भा बइठा दीहल गइल बाड़ें. कमण्डल मण्डल के डकार गइल आ डकरबो ना कइलसि. हाथी के देखाएवाला दाँत आजुओ हिन्दूहित के बाति करत लउकत रही बाकिर जमीनी स्तर पर कुर्मी बनाम तेली के खेलो खेलत होखी त हमरा अचरज ना होखी. अब सोचसु अखिलेश, लालू, केजरीवाल, सिद्धारमैया वगेरह लोग. बनर्जी मुखर्जी स्टालिन के त अब सोचलो के जरुरत नइखे. काहें कि अपना देश में मजहब बदलल जतने आसान बना के राखल गइल बा ओतने कठिन बा जाति बदलल. जाति रउरा बदलिए ना सकी.
एहसे तेल देखत रहीं आ तेल के धार !
0 Comments