सावन में काँवड़ यात्रा होखे भा कजरी गीत–गवनई, फागुन में फगुआ आ चइत महीना में चइती–चइता. भोजपुरी में हर सीजन, हर महीना ला कवनो ना कवनो गीत रिलीज होखते रहेला आ भाजपुरी गायक–गायकियन के एगो बड़हन फौज हमेशा लागल रहेले कुछ ना कुछ नया करे ला.
अब रउरा एहमें मीन–मेख निकालीं भा जयकारा गाईं ई रउरा पर निर्भर बा. बाकिर एक बाति त तय बा कि भोजपुरी अपना गीते–गवनई का चलते जिन्दा बिया ना त आजु के पढ़ल–लिखल, सभ्य, सुसंस्कृत लोग कहिये सराध करा दिहले रहीत भोजपुरी के.
अपना बीस बरीस का उमिर में भोजपुरी में शुरु भइल पहिलका वेबसाइट – अँजोरिया डॉटकॉम – बहुते उतार –चढ़ाव देखत आइल बिया. तरह–तरह के लोग एकरा से जुड़ल बाकिर ई केहू से ना जुड़ सकल. काहें कि हम एह नीति में कबो विश्वास ना कइनी कि तू हमरा ओरि ताकऽ हमरा तोहरा ओरि ताकी. तू हमार पीठ थपथपावऽ, हम तोहार पीठ थपथपाएब. हालांकि हम सभकर जयकारा गवनी, बिना एकर चाह कइले कि लोगो हमार जयकारा गावे. सभकर खबर अँजोर कइनी बाकिर बीसवां बरीस पर लोग से शुभकामना के दू गो शब्द सुने के कामना कइनी त ऊ कामने रहि गइल. जबले कमात रहनी, तबले फिकिर ना कइनी कि अँजोरिया पर कतना खरच होखत बा. अब जब कमाई के उमिर ना रहि गइल त लोग से निहोरा कइनी कि कुछ कुछ सहयोग करत रहीं सभे. बाकिर पांच लोग से बेसी ना मिल पवलें. भुला गइनी कि सभे अपना में परेशान बा दोसरा के सहजोग कइसे करो. रहिमन वो नर मर चुके जो कहूं मांगन जाय, उससे पहिले ऊ मुवे जिन मुख निकसत नाहीं. सभका एकरे फिकिर बा कि
आईं अब एह वीडियो का बारे में जान लीहल जाव. भोजपुरी सिनेमा के स्टार गायक पवन सिंह के ई वीडियो एके दिन में बारह लाख से बेसी लोग देख लीहल आ जब ले ई पन्ना रउरा पढ़े आएब तहिया ले पता ना अउर कतना करोड़ लोग देख लिहले रही.
प्रियांशु सिंह के संगीत निर्देशन में पवन सिंह आ शिवानी सिंह का गावल ई माई–भजन “सजल दरबार” के गीतकार हउवें आशुतोष तिवारी. डीआरएस म्युजिक कंपनी से जारी एह तरह के वीडियो बनावे–जारी करे का बारे में कुछ जाने के मन होखे त रउरा Trade Enquiry :- 92637 33397 से कर सकीलें.
पहिले एह तरह के जानकारी पीआर लोग का मार्फत आ जात रहुवे बाकिर अब फोकट में शंख बजावल छोड़ दिहले बानी. अपने से जवन संभव हो सकी, भा समय का हिसाब से ठीक लागी ओकरा के जब तब अँजोर करत रहब. आखिर रउरो लोग देवर–भउजाई के संवाद कतना पढ़ब. बीच–बीच में कुछ मनोरंजन करत–करावत रहल जरुरी बा.
0 Comments