खेसारीलाल के नया गीत – राम जाने

Photo source: video on youtube.com

आजु अनहियें कुछ घंटा पहिले खेसारी लाल यादव के गावल गीत – ‘राम जाने कि तोहर काम जाने’ यूट्यूब पर रिलीज भइल बा. आ जब ले हम एकरा के देखनी आ रउरा सभे के सुनावे ला चुननी तब ले एकरा के करीब बारह लाख लोग देख चुकल बा. एकरे के कहल जाला भोजपुरी गीत-गवनई के ताकत.

एही ताकत का चलते हिन्दी सिनेमा वाले बाकायदा एगो आन्दोलन चला के भोजपुरी गीत-गवनई के बदनाम करावे के. आ एह चाल में आम भोजपुरिोओ फँस गइलें आ उहो कहे लगलें कि भोजपुरी गीत अश्लील होखेली सँ.

मानत बानी कि भोजपुरी गीत-गवनई में कुछ अइसनो गीत आवत रहेली सँ जवना के बनावल त जाला आम आदमी ला बाकिर जब ओकरा के हिन्दीदां भा अंगरेजी में फटर-फटर करे वाला समुझिए ना पावसु.

जुम्मा के जुम्मा चुम्मा के वादा अश्लील ना होखे, चुनरी के नीचे क्या है, चोली के पीछे क्या है अश्लील ना होखे बाकिर लहँगा उठा देब रिमोट से एही लोग के अश्लील लागे लागेला.

खैर आजु त श्लील-अश्लील के बकवास के कवनो जरुरते नइखे का‌हें कि एह गाना में कवनो दुअर्थी बोल नइखे ना ही वीडियो के हाव भाव अश्लील कहाए जोग बा. एहसे एह गाना के रउरा मजे से सभका सोझा देख सुन सकीलें. आ हमरा कहला पर काहे जाईं. खुदे सुन के तय करीं. नीमन लागे त अपना फेसबुक, इंस्टा. ट्वीदर, ह्वाट्सअप पर शेयर करीं. ना त कहीं अइसन मत होखे कि रउरो से पुछाए लागे कि हमरा के इंस्टा पर ब्लॉक काहे कइलऽ ?आ रउरा कहे लागीं कि –
हम दिहनी धोखा कि तू दिहलू
सारा बतिया भगवान जाने.

खेसारी लाल यादव आ शिल्पी राज के गावल एह गीत के गीतकार अखिलेश कश्यप, संगीतकार विकास यादव, निर्देशक पवन पाल, पर्दा पर सपना चौहान आ खेसारीलाल यादव, निर्माता मनीषा सिंह आ परोसले बावे मन्शा इंटरटेनमेंट. एकर डिजिटल हेड कमलेश कुमार आ डिजीटल पार्टनर हवे मार्जिन मीडिया इंटरटेनमेंट.