भउजी हो, अइसनो होला का…
हँ बबुआ, अइसन त होते रहेला.
का ?
उहे जवन रउरा पूछनी हऽ ?
का पूछनी हऽ ?
इहे कि अइसनो होला का. आ होखे के त कइसनो हो सकेला, अइसनो हो सकेला, वइसनो हो सकेला, तइसनो हो सकेला. हँ अब साफ-साफ पूछीं का पूछत रहनी हऽ ?
सुने में आवत बा कि रुस के राष्ट्रपति व्लादिमीर पुतिन पिछला कुछ महीना से अपना बदले अपना डुप्लिकेट से काम चलावत बाड़न काहें कि उनुकर तबियत अतना खराब बा कि सार्वजनिक तौर पर बहुते ना आ सकसु. आ टटका खबर सुने में आवत बा कि उनुका दिल के दौरा पड़ल बा आ उनुकर गहन चिकित्सा करावल जा रहल बा.
ऐ बबुआ, साँच पूछीं त एहमें अचरज के कवनो बाति ना होखे के चाहीं. आजुए से ना बरीसन से अइसन होत आइल बा. हाल फिलहाल के इतिहास त एह तरह के उदाहरणन से भरल बा. जनरल बर्नार्ड मॉन्टगुमरी, जोसेफ स्टालिन, सुकर्णो, हेनरी किसिंजर, बोरिस एल्तसिन, सद्दाम हुसैन, ओसामा बिन लादेन, वगैरह कतना नाम गिनावल जा सकेला. आ सबले चटकदार त ई कि इहो दावा करेवाला बाड़ें जे कहत रहलें कि महारानी एलिजाबेथ मरद रहली. आ एही चलते ऊ कबो बिआह ना कइली.
ई का भउजी, पूरा बतावऽ.
बतावल जाला कि असली एलिजाबेथ प्रथम के मौत उनुका दसे बरीस का उमिर में हो गइल रहुवे. उनुका देखभाल करे खातिर लोग हदस गइल कि अगर एलिजाबेथ प्रथम के बाबूजी हेनरी अष्टम के ई मालूम हो गइल त ऊ सभकर जान ले लिहें. एहसे आपन जान बचावे खातिर ऊ लोग खोजे लागल कि एलिजेबेथ का तरह लउके वाला कवनो लईकी के एलिजाबेथ बना के राख लीहल जाव. कवनो लईकी त ओइसन ना मिलल बाकिर बिस्ले गाँव के एगो लईका हूबहू उनके कद-काठी के भेंटा गइल. ओहि लईका के सिखा-पढ़ा के ऊ लोग एलिजाबेथ प्रथम का जगहा राख दीहल. कहेवाला कहत रहलें कि एही चलते एलिजाबेथ प्रथम कबो बिआह ना कइली आ बाद में बुढ़इला पर ऊ गंजो – टकला – हो गइल रहुवी. एह ‘कहानी’ पर ब्रैम स्टोकर त एगो किताबे लिख दिहलें फेमस इम्पोस्टर्स नाम से.
आ रउरा त सुनलहीं होखब कि अपना पीएम नरेन्द्रो मोदी के कईगो डुप्लिकेट बाड़ें जिन्हन के इस्तेमाल भाजपा जब-तब जुलुस-जलसा में इस्तेमालो करत रहेले. एगो लिंक रउरो देख लीं यूट्यूब के –
अरे भउजी तूं त कमाल के जानकारी राखेलू.
ना बबुआ, गूगल आ विकिपीडिया का जमाना में सगरी जानकारी राखल जरुरी नइखे रहि गइल. जबे मन करे गूगल बाबा से सवाच लीं ऊ एगो-दू गो ना कई हजार लिंक परोस दिहें.
हमरा ला त सबले आसान बा कि भउजी से पूछि लऽ.
0 Comments