दू दिन पहिलहीं लिखले रहीं कि सभका से, खास कर के भोजपुरिया नेता, अभिनेता, सांसद, विधायक से, कि ऊ लोग अपना पोस्ट में, अपना भाषण में भोजपुरी के उपयोग कइल करे. सोशल मीडिया पर त सभे बा, आ ओहमें से अधिका लोग के मीडिया प्रभारी बाड़ें जे एकरा के सम्हारेलें. ओह लोग के निर्देशन मिले कि रोजाना कम से कम एगो पोस्ट भोजपुरी में डालल करे उनुका सोशल मीडिया पर.
खोजत त हमेशा रहीलें कि कुछ ना कुछ नया मिल जाव यूट्यूब पर भोजपुरी में जवना के हम अपना पाठकन से मिल बाँट सकी. रोजे कुछ ना कुछ मिलते रहेला. आजु वइसने एगो लिंक शेयर करत बानी रउरा सभे से. करीब दू महीना पुरान हो गइल एह वीडियो के, बाकिर एकरा के आजुओ देखे सुने में कवनो हरजा नइखे. चाहत बानी कि अउरिओ भोजपुरिया सांसदन, विधायकन के अइसने भोजपुरी भाषण के लिंक मिलल करो. एहसे भोजपुरी के उपादेयता सभका सोझा आई आ सभका लागी कि हमनी का भोजपुरी से नेह-छोह रखले बानी आ शान से भोजपुरी में बोले-बतियाइले हमनी का.
जानत बानी कि दिक्कत कहवाँ बा ? खरबका भा फूहड़ गीत-गवनई का खिलाफ बोले वाला त बहुते भेंटा जाले बाकिर ना मिलसु त ऊ लोग जे भोजपुरी के अइसनका गीत-गवनई का बारे में बतावल करे, साझा करत रहे जवना गीत-गवनई के सभे आ शान से सुन सके. सोचत बानी कि भोजपुरी में बीसो बरीस से बेसी पुरान पहिलका वेबसाइट अंजोरिया पर रोज एगो बढ़िया गीत साझा करत रहीं. देखत बानी कि निमनका खोजत रहला के परिणाम बा कि यूट्यूबो हमरा के अइसने बढ़ियके गीतन के लिंक देखावे लागल बा. अगर सभे निमनके गीत सुने लागे, खोजे लागे त निमनके छाप ली भोजपुरी के आसमान आ फूहड़कन के जगहा ना मिली ठाड़ होखे के. भोजपुरी के खरबका गीत-गवनई के ओकर आलोचना कर के, ओकरा के गरिया के ना मिटावल जा सकी. दोसरे होखी का कि उहे सब गीत-गवनई सामने आवत रही. रउरो सभे तय कर लीं कि जबे सुनब बढ़ियके गीत-गवनई, आ ओकरे के शेयर कइल करब.
चलीं अब सुनल जाव गोरखपुर से भाजपा सांसद आ भोजपुरी सिनेमा के सुपरस्टार रहल रविकिशन के भोजपुरी भाषण. धेयान दीं सभे कि ई भाषण भोजपुरी में ना होके भोजपुरी में भाषण बा ! तनिका जोर देब सभे त रउरो मान लेब कि हँ एकर फरक कमाल के बा !
0 Comments