खेत खाए गदहा मार खाए जोलहा

आरएसएस से जुड़ल भारतीय मजदूर संघ के ईकाई दिल्ली परिवहन मजदूर संघ डीटीसी बसन के ड्राइवर आ कंडक्टरन पर एफआईआर दर्ज कइला के विरोध कइले बावे. दिपमसंघ के कहना बा कि एहसे कर्मचारियन के मनबल टूटी. एहसे ड्राइवर आ कंडक्टरन का खिलाफ दर्ज मुकदमा रद्द कइल जाव.
जाने जोग बा कि साजिशन अफवाह फैला के लॉकडाउन का दौरान प्रवासी मजदूरन का बीच दिल्ली से भागे के अफरातफरी फैलावल गइल. सरकार में शामिल गोल हल्ला उड़वलसि कि मजदूरन के उनुका गाँ ले चहुँपावे खातिर दिल्ली सीवान पर बस खड़ा बाड़ी सँ आ एह लोग के ओहिजा ले चहुँपावे खातिर डीटीबस खड़ा बाड़ी सँ. केकरा आदेश से एह बसन के लगावल गइल से अबहीं ले साफ नइखे भइल. बाकिर खेत खोए गदहा मार खोए जोलहा वाला कहाउत साँच करत 44 गो डीटीसी आ क्लस्टर बस के ड्राइवरन आ कंडक्टरन का खिलाफ शकरपुर पुलिस स्टेशन में एफआईआर दर्ज करावल गइल बा.
भारतीय मजदूर संघ से संबद्ध संगठन डीपीएमएस के महामंत्री कैलाश चंद्र बियफे का दिन कहलन कि डीटीसी के ड्राइवर आ कंडक्टर कोरोना महामारी के एह बिपति का बीच सरकार के हर आदेश के पालन निष्ठा से करत बाड़ें. आ एही लोग का खिलाफ मुकदमा दर्ज करा के एह लोग के मनबल तूड़ल जा रहल बा.
कहलन कि कर्मचारी अपना मन से कुछ ना करसु. विभागीय अधिकारी जवन आ जइसन आदेश देलें तवने आ तइसने करेलें, एहसे पहिले ई पता लगावल जाय कि के आदेश दीहल एह बसन के चलावे के आ ओकरे पर मुकदमा कइल जाव.
सरकारी आदेश पालन करेवाला एह मजबूर कर्मचारियन का खिलाफ कवनो कार्रवाई ना होखे के चाहीं.
जाने जोग इहो बा कि कुछ देशद्रोहियन के मनसा हो सकेला कि प्रवासी मजदूरन के भगवा के ओह लोग का बदले घुसपैठियन रोहिंग्यन के काम पर लगवा दीहल जाय.