काल्हु अपना मन का बात कार्यक्रम में प्रधानमंत्री नरेन्द्र मोदी कहलन कि कोरोना के पहिलका लहर के हरवला का बाद हौसला से भरल देश दुसरको लहर के तूफान से पार पा ली. कहलन कि कोरोना के दुसरका लहर हमनी के धीरज आजमावत बा. कहलन कि लोग अफवाहन पर ध्यान ना दे के एकरा से निपटे पर ध्यान देव. सभके टीका लगवावे के चाहीं.
एही बीच खबर आवत बा कि अमेरिका आपन फैसला पलटत अब वैक्सिन खातिर जरुरी सामान के निर्यात के अनुमति दे दिहले बावे. दुनिया भर से हिन्दुस्तान के एह आपदा में तरह तरह के जरुरी उपकरण, आक्सीजन, आ सामान भेजल जा रहल बा. वैक्सिन के निर्यात कइला के फायदा आजु देश देख रहल बा. अपना खराब दिन में भारत अकेले नइखे, पूरा दुनिया ओकरा साथे खड़ा बा.
दिल्ली उच्च न्यायालय में जनहित याचिका डाल के गोहार कइल गइल बा कि न्यायिक अधिकारियनो के फ्रंटलाइन वर्कर मानल जाव आ ओहू लोग के परिजन ला कोविड अस्पताल तय कइल जाव.
मुख्य चुनाव आयुक्त सुशील चंद्रा आ चुनाव आयुक्त राजीव कुमार के नेतृत्व में चुनाव आयोग शनीचर का दिने पश्चिम बंगाल के अघिकारियन का साथे बइठक करि के कोविड महामारी का बीच हो रहल विधानसभा चुनाव का दौरान कोविड-19 दिशानिर्देशन के पालन करे पर बातचीत कइलसि.
आजु बंगाल चुनाव के सतवां डेग में 34 सीट के चुनाव करावल जा रहल बा. सबेरे सात बजे से शुरु मतदान साँझ साढ़े छह बजे ले होखी.
पश्चिम बंगाल में होखत विधानसभा चुनाव में हिंसा के घटना लगातार जारी बा. काल्हुओ नदिया जिला में भइल बम विस्फोट के घटना में एगो नवही के मौत हो गइल आ एगो अउन नवही घवाहिल हो गइल.
यूपी पंचायत चुनाव के तिसरका दौर के मतदान आजु हो रहल बा. आजु बलिया, देवरिया, चन्दौली, मिर्जापुर समेत बीस जिलन में मतदान चालू बा.
यूपी के मुख्यमंत्री योगी आदित्यनाथ आदेश दिहले बानी कि अगर सरकारी अस्पताल में बेड नइखे खाली आ कोरोना मरीज के भरती कइल जरुरी बा त ओकरा के निजी अस्पताल में भरती करावल जाय आ ओकर खरचा सरकार दी.
कौशांबी जिला में जिला पंचायत चुनाव में भाजपा के अधिकृत प्रत्याशियों का खिलाफ बगावत क के जिला पंचायत सदस्य के चुनाव लड़े वाला 15 गो भाजपा पदाधिकारियन के छह बरीस ला गोल से बाहर कर दीहल गइल बा.
पश्चिम चंपारण जिले के नौरंगिया इलाका में एगो राशन दुकानदार से पाँच लाख के रंगदारी माँगे वाला माओवादी के पुलिस काल्हु अतवार के गिरफ्तार क लिहलसि.
जौनपुर में दूरदर्शन अपना प्रदेश के ब्यूरो चीफ आ दैनिक हिन्दुस्तान के पत्रकार संजय मिश्र के कोरोना छूताह भइला का बाद काल्हु अतवार के निधन हो गइल.
इलाहाबाद विश्वविद्यालय में भौतिकी विभाग विभागाध्यक्ष रहल आ वीर बहादुर सिंह पूर्वांचल विश्वविद्यालय प्लेसमेंट सेल के निदेशक रहल प्रोफ़ेसर रंजना प्रकाश के काल्हु अतवार का दिने इलाहाबाद के अस्पताल में निधन हो गइल.
बलिया जिला के बेरुआरबारी विकास खण्ड में तैनात ग्राम विकास अधिकारी के पंटायत चुनाव में ग्राम पंचायत प्रधान पद के उम्मीदवार अपना भाई खातिर वोट माँगे का आरोप में निलम्बित क दीहल गइल बा.
आईपीएल के मैच में काल्हु चेन्नई सुपरकिंग्स 69 रन से रॉयल चैलेंजर्स बेंगलुरु के हरा दिहलसि.
0 Comments