बांग्लादेश के यात्रा पर गइल प्रधानमंत्री नरेंद्र मोदी शनिचर का दिने अपना दिनचर्या के शुरुआत सतखीरा में जेसोरेश्वरी काली शक्ति पीठ में पूजा-अर्चना से कइनी. ओकरा बाद ओराकांडी जा के मटुआ संप्रदाय के पूज्य श्री श्री हरिचांद ठाकुर देव जी के मन्दिर जा के आशीर्वाद लिहनी. ओहिजा अपना संबोधन में कहनी कि ठाकुर देव जी के शिक्षा रहे कि देश दुनिया में, अस्थिरता, आतंक अउर अशांति का जगहा स्थिरता, प्रेम अउर शांति के प्रधानता रहो आ भारत अउर बांग्लादेश दुनु के इहे चाहीं आजु.
बांग्लादेश आ भारत के बीच आपदा प्रबंधन, आईसीटी उपकरण, अउर खेल वगैरह लेके पांच गो समझौता कइल गइल. भारत-बांग्लादेश मैत्री टिकट जारी कइल गइल आ भारत का तरफ से 109 गो एम्बुलेंस उपहार में देबे के घोषणा भइल. प्रधानमंत्री मोदी तुंगीपाडा में बंगबंधु मुजिबुर्रहमान के मकबरा परिसर में पुष्पांजलि अर्पित कइनी. जान जाईं कि मोदी जी पहिलका विदेशी शासनाध्यक्ष हईं जे बंगबंधु के मकबरा पर श्रद्धांजलि अर्पित कइल.
असम आ पश्चिम बंगाल विधानसभा चुनाव के पहिलका चरण के मतदान शांति से हो गइल. असम में 72.3 प्रतिशत त पश्चिम बंगाल में 79.79 प्रतिशत मतदान होखे के खबर बा.
23 मार्च 2021 से स्वेज नहर में अटकल जहाज आजुओ ना निकल सकल. एह चलते स्वेज नहर हो के जहाजन के आवाजाही रुक गइल बा दुनिया भर पर एकर खरा असर पड़ रहल बा.
दिल्ली में हो रहल निशानेबाजी विश्व कप में शनिचर का दिने भारत 25 मीटर एयर पिस्टल रैपिड फायर मिक्स्ड इवेंट में स्वर्ण आ रजत पदक जीत लिहलसि एह टूर्नामेंट में भारत अहबीं ले 13 गो स्वर्ण, 8 गो रजत आ 6 गो कांस्य जीत के पदक तालिका में माथ पर बइठल बा.
फ्रांस में चलत ओरलियंस मास्टर्स बैडमिंटन टूर्नामेंट के पुरुष डबल्स में भारत के कृष्णा प्रसाद आ विष्णु वर्धन सेमीफाइनल मैच में ब्रिटेन के कैलम हेमिंग अउर स्टिवन स्टालवुड के हरा के फाइनल में चहुँप गइले. जबकि महिला सिंग्लस के सेमीफाइनल में साइना नेहवाल डेनमार्क के लिने क्रिस्टोफर्सन से हार के प्रतियोगिता से बाहर हो गइली.
आजु अतवार का दिने भारत आ इंग्लैंड के बीच तिसरका आ आखिरी एकदिना मैच पुणे में खेलल जाई. एह शृंखला में दुनु टीम एक एक मैच जीत के बराबरी पर बा.
गोपालगंज जिला के महमदपुर गाँव का लगे भइल एगो सड़क हादसा में कार ट्रक टक्कर से सहरसा के एके परुवार के चार जने के मौत हो गइल. ई लोग फगुआ में दिल्ली से अपना घरे जाए ला निकलल रहुवे.
गोरखपुर में हुतात्मा अशफाक उल्ला खाँ प्राणि उद्यान का नाम से बनल पूर्वांचल के पहिलका चिड़ियाघर के लोकार्पण यूपी के मुख्यमंत्री योगी आदित्यनाथ जी कइनी.
0 Comments