तीन बरीस में 40 लाख नवहियन के रोजगार मिली यूपी में : योगी

लखनऊ, 21 फरवरी (वार्ता). राजधानी लखनऊ में आजु से शुरू दू दिन के ‘इन्वेस्टर्स समिट’ में दुनिया के खासमखास कारोबारी हस्तियन का मौजूदगी से उत्साहित मुख्यमंत्री योगी आदित्यनाथ कहनी कि समिट से यूपी में निवेश बढ़ी आ राज्य के 40 लाख नवहियन के रोजगार मिले के मौका बनी.

योगी जी कहनी कि प्रधानमंत्री नरेन्द्र मोदी के मार्ग निर्देशन में उत्तर प्रदेश के बीमारू राज्य से बाहर निकाल के समृद्ध राज्य बनावल जाई. कहनी कि प्रदेश विकास के राह पर सरपट दउड़े ला तइयार बा.

कहनी कि प्रदेश सरकार विधानसभा में चार लाख 28 हजार करोड़ रुपिया के बजट पेश कइलसि आ संजोग देखीं कि समिट में अतने रकम के एमओयू पर हस्ताक्षर हो गइल. विकास के कवनो विकल्प ना होखे आ एकरा ला सुशासन चाहेला.

सरकार कई सेक्टर तइयार कइले बिया जवना में फिल्म टेलीविजन, एग्रीकल्चर, इलेक्ट्रानिक सामानन के उत्पादन होखे के बा. विकास ला सुरक्षा, इंफ्रास्ट्रक्चर, आ बढ़िया माहौल होखे के चाहीं. प्रदेश सरकार अपना एगारहे महीना का राज में कानून के राज बना गिहले बिया. बतवनी कि कानपुर, वाराणसी, गोरखपुर, आ इलाहाबाद में मेट्रो चलावे के कोशिश हो रहल बा.

कहनी कि उद्योगन के स्थापना से प्रदेश में रोजगार के अवसर बढ़ी. एकरा ला उद्योगपतियन के ग्रुप बनावल गइल बा. ‘ईज आफ डूइंग’ खातिर सगरी काम कइल जा रहल बा. डिजिटल कामे चलावल जात बा. एकरा अलावे कुटीर उद्योग आ वन डिस्ट्रिक वन प्रोडक्ट लेके लगातार काम कइल जा रहल बा.