शुक का दिने निफ्टी-50 पिछलका दिन (बियफे) बनल हाई आ लो का बीचे मँड़रात रहि गइल. खुलत बेरा पुरान रुकावट, बान्ह भा अवरोध रेखा के पार त कइलसि बाकिर ओहिजा से नीचे आवे में देर ना लागल. बाद में उपरी बेरा फेरु एक बेर ओह अवरोध रेखा के पार करे के कोशिश कइलसि बाकिर पार कइल त दूर के बाति, छुइओ ना पवलसि. आ फेरु नीचे के राहि ध लिहलसि.
जइसन कि अँजोरिया पर लिखले रहीं एह बड़हन अवरोध रेखा के पार कइल निफ्टी-50 ला एगो चुनौती बनि गइल बा. अगस्त 2022 से पहिले निफ्टी-50 तीन बेर एह अवरोध के पार करे के कोशिश कइलसि बाकिर हर बेर असफल रहल. उपर से हर बेर एकरा नीचे गिरे के दूरी बढ़त चलि गइल. एह अगस्त से अबले ई आठ बेर कोशिश क चुकल बा. कुछ दिन त ई ओकरा पारो रहि के देखवलसि बाकिर टिक ना पवलसि. वइसे अधिका उमेद कइल जा सकेला कि एह साप्ताहिक वायदा सीरिज में निफ्टी-50 अवरोध रेखा के पार करे आ ओकरा उपर टिके में सफल हो जाई.
बाकिर उमेद उमेदे होला आ ओकरा संभव होखे के संभावना मौसम के भविष्यवाणी कइला से बेसी के ना रहे. अगर अबकिओ बेर ई अवरोध अपार साबित भइल त अनेसा बा कि अबकी के गिरावट निफ्टी-50 के 15000 का नीचे ले जा सकेला.
अगर अवरोध रेखा निकहा से पार हो गइल त दिवाली का दिने निफ्टी-50 20000 ले जा सकेला. दोसरा तरफ अगर असफल रहल त 15000 से नीचे जाहूं के अनेसा बनल बा. एहिसे एह हफ्ता बहुते सम्हर के रहे के बा आ कवनो बड़हन सौदा नइखे करे के. अगर एह दंगल में मूड़ी फँसावे के शौक बा त स्टॉप लॉस बन्हले बिना कइल कवनो सौदा राउर डाँड़ तूड़ सकेला भा किस्मत के साँढ़ होखब त बड़हन लॉटरिओ लाग सकेला.
वइसे हम त इहे राय बना के रखले बानी कि बाजार कहीं जात नइखे. एहिजे रही. मौका फेरु मिली. कुछ दिन सौदा ना करब त ओतना नुकसान नो होखी जतना नुकसान के अनेसा बन सकेला.
सोमार का दिने जब ले निफ्टी-50 17475 से 17650 का बीच रही तबले हम अपना तरहथी पर बइठल रहब जेहसे कि हाथ कंप्यूटर के बटन ना दबा सको. 17650 का उपर निकलला पर एक बेर खरीदे के जरुर सोचब हम. आ अगर जे ई 17450 से नीचे निकलल त बिकवाली के विकल्प चुनब हम. रउरा का करब खुद फैसला करीं भा अपना सलाहकार का सलाह पर काम करीं. हमरा राय पर चले में आम त ना आई बाकिर लबेदा भुलाए के अनेसा हमेशा बनल रही.
0 Comments