टोक्यो पैरालिम्पिक 2020 खेलन में जन्माष्टमी के दिन भारत खातिर शानदार रहल

(टटका खबर, सोमार, भादो अन्हरिया अष्टमी, 2078 विक्रमी)

टोक्यो पैरालिम्पिक 2020 खेलन में जन्माष्टमी के दिन भारत खातिर शानदार रहल. दू गो स्वर्ण, चार गो रजत आ एगो कांस्य पदक मिला के कुल्ह सात गो पदक अबहीं ले भारत का हिस्से आइल बा. आ एह पदकन के जीते में कई गो रिकार्डो बनल आ टूटल बा.

19 बरीस के भारत के शूटर अवनी लेखरा पैरालिम्पिक में स्वर्ण पदक जीते वाली पहिलका भारतीय महिला होखे के गौरव हासिल कइली जब महिला वर्ग के आर टी 10 मीटर एयर राइफल निशानेबाजी में ऊ स्वर्ण पदक जीत लिहली. एह पदक के जीते में ऊ 249.6 अंक के विश्व रिकार्ड के बराबरी क लिहली आ पैरालिम्पिक खेल में एगो नया रिकार्ड बना दिहली.

भाला फेंक प्रतियोगिता में हरियाणा के सोनीपत के 23 बरीस के सुमित अंतिल 68.55 मीटर दूर ले भाला फेंक के स्वर्ण पदक हासिल क लिहलन. 64.35 मीटर दूर ले भाला फेंक के देवेन्द्र झझरिया रजत पदक आ 62.58 मीटर ले भाला फेंक के सुन्दर सिंह गुर्जर कांस्य पदक जीतलन.

डिस्कस फेंक प्रतियोगिता में योगेश कठुनिया 44.38 मीटर ले फेंक के रजत पदक हासिल कइलन. विनोद कुमार के डिस्कस फेंके में मिलल कांस्य पदक बाद में रद्द हो गइल जब देखल गइल कि ऊ एह प्रतियोगिता ला अयोग्य रहलन.

ऊँची कूद प्रतियोगिता में निषाद कुमार 2.06 मीटर ऊँचाई कूद के रजत पदक हासिल कइलन. ई एगो एशियन रिकार्डो बन गइल.

टेबल टेनिस में भारत के भाविनाबेन हसमुखभाई पटेल के रजत पदक से संतोष करे के पड़ल.

स्वर्ण पदक – अवनी लेखरा आ सुमित अंतिल
रजत पदक – देवेन्द्र झझरिया, निषाद कुमार, योगेश कठुनिया, भाविनाबेन हसमुखभाई पटेल
कांस्य पदक – सुन्दर सिंह गुर्जर