टोक्यो में होखत पैरालिम्पिक 2020 में आजु भारत का नामे दू गो अउर पदक आ गइल आ अबकी का खेल में अबहीं ले 19 गो पदक जीते के रिकार्ड बन गइल.
आए दिन तरह तरह के उलजलूल पादे वाला पप्पू अब पदक जीते वाला खिलाड़ियन के बधाई दिहले बन्द कर दिहलसि. हो सकेला कि ओकरा के समुझा दीहल होखे कि खेल जगत में मिले वाला एह शानदार सफलता के श्रेय मोदी सरकार के मिले वाला बा एह चलते एकर अनदेखी कइल करे.
आजु पहिला पदक जीतलन गौतमबुद्ध नगर के जिलाधिकारी सुहास एल यतिराज. ऊ भारत खातिर 18वां पदक जीतलन मेंस सिंगल्स बैडमिंटन प्रतियोगिता में रजत पदक. पहिला मुकाबला जीतला का बाद सुहास आगे के दू गो मुकाबला हार गइलन आ उनुका रजते से संतोष करे के पड़ल.
बाकिर एकर अफसोस कम करत भारत खातिर पाँचवाँ स्वर्ण पदक जीत लिहलन 22 बरीस के राजस्थानी खिलाड़ी कृष्णा नागर. भारत खातिर ई 19 वाँ पदक रहल एह पैरालिम्पिक में. बैडमिंटन खिलाड़ी कृष्णा नागर आजु बैडमिंटन पुरुष एकल मुकाबला जीत के ई स्वर्ण पदक हासिल कइलन.
टोक्यो पैरालिम्पिक खेलन में भारतीय खिलाड़ी दमदार प्रदर्शन करत अबहीं ले पांच गो स्वर्ण, आठ गो रजत आ छह गो कांस्य पदक जीतले बाड़न. पदक जीतेवाला खिलाड़ियन के अद्यतन सूची –
स्वर्ण पदक – अवनी लेखरा, मनीष नरवल, प्रमोद भगत, सुमीत अंतीला, आ कृष्णा नागर.
रजत पदक – भवानीबेन हसमुखभाई पटेल, सिंहराज अदाना, निषाद कुमार, प्रवीण कुमार, शरद कुमार, मरियम थंगावेलू, देवेन्द्र, आ सुहास यतिराज.
कांस्य पदक – अवनी लेखरा, मनोज सरकार, सिंहराज अदाना, सुन्दर सिंह गुर्जर, हरविंदर सिंह, आ योगेश कठुनिया.
अवनी लेखरा आ सिंहराज अदाना दू दू गो पदक जीतले बाड़न.
0 Comments