जनतब, अनचिन्हार आ परिचिताह (बतकुच्चन – 184)

by | Mar 30, 2015 | 0 comments

admin
जनतब, अनचिन्हार आ परिचिताह. तीनो के तीनो जान-पहचान से जुड़ल शब्द आ आजु के बतकुच्चन एकनिए पर. जनतब के जगहा हिन्दी में जंतव्य ना होखे आ हिन्दी के गंतव्य का जगहा भोजपुरी में गनतब ना भेंटाव. परिचित त हिन्दीओ में भेंटा जाई बाकिर परिचिताह भोजपुरिए में मिलेला, हिन्दी में नइखीं पढ़ले कबो. परिचिताह ना त परिचित होला ना अपरिचित. ऊ एह दुनू का बीच के होला त्रिशंकु जइसन. ना त स्वर्गे में जा सकल ना धरतिए पर लवट सकल, बीचे में लटक के रह गइल. परिचिताह आदमी लागेला परिचित जइसन बाकिर याद ना पड़े कि के ह भा कब कहाँ भेंटाइल रहे. चेहरवा देखल लागत बा बाकिर सही-सही याद नइखे पड़त. अब अइसन आदमी के अपरिचित त कहल ना जा सके आ परिचितो बतावे में जोखिम बा त एगो शब्द गढ़ा गइल परिचिताह. जे परिचित जइसन लागे, परिचय के आहट जइसन सुनाव मन-दिमाग में, जेकरा बारे में.

अब मान लीं कि रउरा कवनो परिचिताह भेंटाइल राह-पेड़ा में. रउरा चाहत नइखीं कि ओकरा के पहचानी, त महटियावे के कोशिश करब. तबले ऊ आदमी टोक दिहलस रउरा के, का हो अनचिन्हार हो गइल बाड़ऽ का आजु? कहे के मतलब कि आजु हमरा के चिन्हे से भागत बाड़ऽ. अनचिन्हल बिना चिन्हाइल आदमी भा सामान का बारे में कहल जा सकेला बाकिर अनचिन्हार ओह आदमी के कहल जाला जे चिन्हियो के ना चिन्हे के नाटक करत होखे. अनजान माने जेकरा बारे में कवनो जानकारी ना होखो, जेकरा के जानत ना होखीं ओकरा के अनजान कहल जाई. बाकिर कई बेर अइसनो होखेला कि जानकारी त पूरा होला बाकिर चिन्हत नइखीं त ऊ अनचिन्हल होला. जइसहीं ओकरा के चिन्ह लेब त पता चली कि रउरा ला ऊ अनजान ना ह, अनचिन्हल ह. जबकि ओकरा ला हो सकेला कि रउरा अनजाने होखीं. रउरा बारे में ओकरा लगे कवनो जानकारी ना होखो.

कई बेर होला कि रउरा बढ़िया से मालूम बा कवनो आदमी का बारे में बाकिर ओकरा के चिन्हत नइखीं. अब ऊ आदमी रउरा मिलियो जाई त रउरा ला ऊ अनचिन्हले रही, जबले केहू चिन्हवा ना देव. अनजान आदमी के चिन्हल ना जा सके. जानकारी का बाद आदमी ओकरा बारे में अपना मन-दिमाग में कवनो चिन्हासी बना लेला आ बाद में दिमाग में बनल ओही चिन्हासी का सहारे ओकरा के चिन्हत रहेला.

ई त भइल अनचिन्हल आ अनचिन्हार के चरचा. चलत चलत जनतबो के निपटावत चलीं. शादी-बिआह का चरचा में अकसर कह दिआला कि ओकर पूरा परिवार जनतब में बा. जनतब माने जेकरा बारे में जानकारी बा. अगर कवनो बात भा घटना रउरा जानकारी में बा त कहल जा सकेला कि रउरा जनतब में ई बात भा घटना बावे. आ जनतब का बारे में अउरी जाने के जरूरत ना होखे. जबले पूरा नइखीं जानत तबले जनतब में होईए ना सके. जवना भा जेकरा बारे में जानकारी होखे ऊ जनतब में होला. कुछ देर पहिले गंतव्य के चरचा कइले रहीं. संस्कृत आ हिन्दी में द्रष्टव्य आ ज्ञातव्य मिलेला. जवन देखला के जरूरत बा ऊ द्रष्टव्य आ जवना बारे में जाने के जरूरत बा तवन ज्ञातव्य. आ जनतब के कवनो दिसाईं ज्ञातव्य से नाता ना खोजल जा सके. काहे कि जनतब का बारे में जाने के जरूरत ना होखे ज्ञातव्य का बारे में होला.

Loading

0 Comments

Submit a Comment

This site uses Akismet to reduce spam. Learn how your comment data is processed.

अँजोरिया के भामाशाह

अगर चाहत बानी कि अँजोरिया जीयत रहे आ मजबूती से खड़ा रह सके त कम से कम 11 रुपिया के सहयोग कर के एकरा के वित्तीय संसाधन उपलब्ध कराईं. यूपीआई पहचान हवे - भा सहयोग भेजला का बाद आपन एगो फोटो आ परिचय
anjoria@outlook.com
पर भेज दीं. सभकर नाम शामिल रही सूची में बाकिर सबले बड़का पाँच गो भामाशाहन के एहिजा पहिला पन्ना पर जगहा दीहल जाई.
अबहीं ले 13 गो भामाशाहन से कुल मिला के सात हजार तीन सौ अठासी रुपिया (7388/-) के सहयोग मिलल बा. सहजोग राशि आ तारीख का क्रम से पाँच गो सर्वश्रेष्ठ भामाशाह -
(1)
अनुपलब्ध
18 जून 2023
गुमनाम भाई जी,
सहयोग राशि - एगारह सौ रुपिया

(3)

24 जून 2023 दयाशंकर तिवारी जी,
सहयोग राशि - एगारह सौ एक रुपिया
(4)
18 जुलाई 2023
फ्रेंड्स कम्प्यूटर, बलिया
सहयोग राशि - एगारह सौ रुपिया
(7)
19 नवम्बर 2023
पाती प्रकाशन का ओर से, आकांक्षा द्विवेदी, मुम्बई
सहयोग राशि - एगारह सौ रुपिया

(11)
24 अप्रैल 2024
सौरभ पाण्डेय जी
सहयोग राशि - एगारह सौ रुपिया

पूरा सूची
एगो निहोरा बा कि जब सहयोग करीं त ओकर सूचना जरुर दे दीं. एही चलते तीन दिन बाद एकरा के जोड़नी ह जब खाता देखला पर पता चलल ह.

संस्तुति

हेल्थ इन्श्योरेंस करे वाला संस्था बहुते बाड़ी सँ बाकिर स्टार हेल्थ एह मामिला में लाजवाब बा, ई हम अपना निजी अनुभव से बतावतानी. अधिका जानकारी ला स्टार हेल्थ से संपर्क करीं.
शेयर ट्रेडिंग करे वालन खातिर सबले जरुरी साधन चार्ट खातिर ट्रेडिंगव्यू
शेयर में डे ट्रेडिंग करे वालन खातिर सबले बढ़िया ब्रोकर आदित्य बिरला मनी
हर शेेयर ट्रेेडर वणिक हैै - WANIK.IN

Categories

चुटपुटिहा

सुतला मे, जगला में, चेत में, अचेत में। बारी, फुलवारी में, चँवर, कुरखेत में। घूमे जाला कतहीं लवटि आवे सँझिया, चोरवा के मन बसे ककड़ी के खेत में। - संगीत सुभाष के ह्वाट्सअप से


अउरी पढ़ीं
Scroll Up