आरजेडी के माने समुझवलन तेजस्वी

आजु पटना के गाँधी मैदान में बड़हन जनसमूह का सोझा भाषण देत बिहार के दू दू बेर उपमुख्यमंत्री रह चुकल तेजस्वी यादव आरजेडी के माने बतवलन कि आर माने राइट्स (अधिकार), जे माने जॉब्स (नौकरी), आ डी माने डेवलेपमेंट (विकास).

गाँधी मैदान में जुटल विशाल भीड़ तेजस्वी के नेतृत्व क्षमता देखवलसि आ राजद के सांगठनिक शक्ति. अगर ऊ अपना पिता लालू प्रसाद के परछाईं से बाहर निकल सकसु त उनुकर राजनीतिक ताकत बहुते बढ़ सकेला.

बाकिर यशवन्त सिन्हा जवना तरह अपना करतूतन से अपना लायक बेटा जयन्त सिन्हा के सगरी भविष्य पर करिया बदरी बन के छाप दिहलन ओहि तरह लालुओ शायद तय कर लिहले बाड़न कि तेजस्वी के पनपे ना दिहें.

आँख पर पट्टी बन्हले न्यायपालिका के लउकत नइखे कि खराब सेहत का नाम पर जमानत पर निकलल चारा घोटाला के सजायाफ्ता मुजरिम कवना तरह मंच पर से गरजत बा आ देश के सेहत बिगाड़े में लागल बा.

तेजस्वी आरजेडी के माने त बतला दिहलें बाकिर का बता सकीहें कि लालू का जमाना में लागत नारा में भू रा बा ल के माने का रहुवे. कहाव कि भूरा बाल साफ करो ! राजनीति में अपना लबरपन से मीडिया के दुलरुआ रहल लालू आजु कहलन कि – ई नरेन्द्र मोदी हिन्दू नहीं है. उनकर भाषण उनुके एगो समर्थक एक्स पर डलले बाड़न ओकरे के एहिजा देखावत बानी. का राजनीति के भाषा अइसने होखे के चाहीं ? एक बेर पूरा भाषण रउरो सुन लीं.

"Modi is not a Hindu. Every Hindu shaves his head after the death of his mother but Modi did not. Why didn't he shave? Tell me!"

— Lalu Yadav destroys Modi in 100 secs 🔥 pic.twitter.com/ATFzlAPSw8

— Rohini Anand (@mrs_roh08) March 3, 2024