अगर रउरो आदत बा यूट्यूब पर चैनलन के देखत रहे के त रउरो देखले होखब कि वीडियो के सामग्री आ ओकरा मथैला में कवनो संबंध ना होखे. एक से एक बझाऊ मथैला मिली रउरा, खास कर के तब जब कवनो मुद्दा वायरल होखे.
आ एह काम में नयका आ कमजोरे चैनल भा प्रस्तोता भर ना, एक से बढ़ के एक मशहूर मीडिया हाउस लागल मिल जइहें सँ. जइसे कि मान लीं कि आजु सभे एह तलाश में बा कि ऊ जानो कि भाजपा लोकसभा चुनाव 2024 में केकरा के आपन उम्मीदवार बनावे जात बिया त करीब करीब सगरी चैनलन के इहे भा अइसन मथैला देखे-पढ़े के मिली कि भाजपा ने बड़े-बड़े सूरमाओं को ठिकाने लगा दिया, पचहत्तर सांसदों को टिकट नहीं मिला वगैरह-वगैरह. जवन चैनल तनिका इज्जतगर होखिहें से मथैला का साथे प्रश्नवाचक चिह्न भा विस्मयादिबोधक चिह्न लगा दिहें, बाकिर अतना महीन कि पहिलका नजर में ऊ लउकबे ना करी. आ जब रउरा सगरी वीडियो आखिर ले देख लेब तब अतने पता चली कि भाजपा में टिकट खातिर चयन प्रक्रिया चल रहल बा आ एक दू दिन में पहिलका लिस्ट आ जाए के उमेद बा.
दोसर खराब आदत होला एह चैनलन के कि एके वीडियो तनिका-मनिका काट-छाँट के कई दिन ले परोसत रहीहें. रउरा त यूट्यूब का मुताबिक लाइव फीड देखत बानी बाकिर ऊ टटका व्यंजन ना बासी फीड होखी.
मानत बानी कि ओह लोग के आपन खरचा निकाले के होला. बाकिर एकर मतलब त ई ना कि अपना पाठकन के झाँसा दे के अपना किहाँ बोलावसु. तनिका ईमानदारी राखीं सभे ! हालांकि आजुकाल्हु ईमानदार मीडिया खोजल ओहि तरह के बात हो गइल बा जइसे कि कट्टर ईमानदार में ईमानदारी खोजल.
असल में हमहूं एही फिराक में बानी कि ऊ लिस्ट हमरो देखे के मिल जाव, जेकरा के अपना पाठकन के परोस पाईं. एक बात के पक्का वादा करब कि चुनाव से जुड़ल कवनो सामग्री या त चुनाव आयोग के लीहल होखी भा राजनीतिक गोलन के आधिकारिक वेबसाइट से. भलहीं तनिका देर हो जाव, बाकिर हमरा कवनो हड़बड़ी नइखे ब्रेकिंग न्यूज का नाम पर बुड़बक फँसावे के.
0 Comments