बतकुच्चन – ९५

by | Jan 25, 2013 | 0 comments


सियन आ सिवान. सोचनी कि आजु के बतकुच्चन एही पर कर लीं. रउरा सोचब कि सियन आ सिवान में का संबंध? एगो कपड़ा के सिलाई, दोसर सीमा के अंत. एह दुनु में कवन रिश्ता हो सकेला? बाकि देखीं त दुनु में बहुते करीबी मिल जाई. कपड़ा के सियन टूटल आ देश के सिवान टूटल एके जस होला. सियन टूटल कपड़ा पहिरे लायक ना रहि जाव आ सिवान टूटल देश रहे लायक. कपड़ा के सियन टूटल त फेर से सियल जा सकेला, देश के सिवान टूटल त फेर से ओही सिवान के जमावल बहुते मुश्किल हो जाला. कपड़ा के सियन त पुरान भइला पर टूटही के बा बाकि देश के सिवान संगे ई मजबूर ना होले. ऊ जब टूटी त अपना कमजोरी से. भितरघात से. दुश्मन का हमला से.

बाहर के दुश्मन आ पड़ोस के दुश्मन दू तरह के होलें. पड़ोस के दुश्मन का बारे में एगो कहाउत चलत आइल बा कि, सिरवां के मुद्दई नव पुरखा के हान. नजदीक के दुश्मन कई पुश्त ले नुकसान चहुँपावेला. आ अगर ओह पड़ोस के दुश्मन के घर के भेदी के सहारा मिल जाव त फेर का पूछे के बा. एक त काली अपने गोर ओपर से लिहली कमरी ओढ़. पुरखा पुरनिया एही से कहि गइल रहलें कि घर के भेदी लंका ढाहे. दूश्मन से निबटल आसान होला घर का भेदी से निबटल मुश्किल. काहे कि ऊ राउर हर गुण अवगुण से परिचित बा, राउर हर कमजोरी से वाकिफ. जानत बा कि कवन जगहा चोट कइला पर रउरा के आसानी से मारल जा सकेला. अइसनका घर के भेदी पड़ोस के दुश्मन ला वइसने सौगात होलें जइसन बिलाई खातिर सूखल मछरी. एगो कहाउत एहू पर बा कि, सिरौना तर सुँगठी बिलाई आँखे नीन? सिरहाना तर सूखल मछरी पड़ल होखे त भला बिलाई का आँखे नीन कइसे आ पाई. ऊ त झपटबे करी आ भकोसला का बादे सूत पाई.

हाल फिलहाल के हालात कुछ अइसने हो गइल बा. पड़ोस के दुश्मन कई बेर पिटा चुकल बा बाकि अपना आदत से मजबूर कुछ ना कुछ शैतानी करत रहला से बाज ना आवे. एह पर एगो कहाउत याद आवत बा कि, सिंह से सरबर करे सियारा, एक थपड़ में दाँत चियारा. सियार सिंह से बरोबरी करे चलल बाकिर एके झाँपड़ बढ़िया से पड़ल त सगरी हेंकड़ी निकल गइल आ दाँत चियार दिहलें. बाकिर कइल जाव त का? आपन धियवा नीमन रहीत त बिरान पारीत गारी? आपन बिटियवा, आपन कर्म ठीक रहीत त दोसरा के का बेंवत जे गरिया के चलि जाइत. हालांकि लड़ाई के मैदान दुश्मन के सुभीता से ना होखे के चाहीं. लड़ाई के समय आ जगहा दुनु अपना फायदा का हिसाब से तय करे के चाहीं. ई ना कि दुश्मन ललकारे आ रउरा ठाँव कुठाँव देखले बिना कूद पड़ीं ओकरा से लड़े. दुश्मन से निबटे से पहिले इहो सोचे के चाहीं कि ऊ चाहत का बा, ओकर मकसद का बा? अइसन त ना कि, एक त बाँड़ अपने जइहें, नौ हाथ के पगहो ले जइहें. दोसरे कहीं अइसन त ना कि चाल केहू तिसर चलत बा आ हमनी का दोसरा से निबटल चाहत बानी. कहल गइल बा कि, सिधरी चाल चलसु बरारी पर बीते. तालाब पोखरा में सिधरी, एक तरह के छोट मछरी, जब कूद फान करे ली सँ त आदमी के पता लाग जाला कि एहिजा मछरी बाड़ी सँ आ जब जाल फेंकाला त सिधरिया त निकल जाली सँ बरारी फँस जाली सँ. आ चलत चलत फेरू याद आ गइल सियन के, जाल डाले से पहिले इहो देख लिहल जरूरी होला कि ओकर सियन त नइखे टूटल?

Loading

0 Comments

Submit a Comment

This site uses Akismet to reduce spam. Learn how your comment data is processed.

अँजोरिया के भामाशाह

अगर चाहत बानी कि अँजोरिया जीयत रहे आ मजबूती से खड़ा रह सके त कम से कम 11 रुपिया के सहयोग कर के एकरा के वित्तीय संसाधन उपलब्ध कराईं. यूपीआई पहचान हवे - भा सहयोग भेजला का बाद आपन एगो फोटो आ परिचय
anjoria@outlook.com
पर भेज दीं. सभकर नाम शामिल रही सूची में बाकिर सबले बड़का पाँच गो भामाशाहन के एहिजा पहिला पन्ना पर जगहा दीहल जाई.
अबहीं ले 13 गो भामाशाहन से कुल मिला के सात हजार तीन सौ अठासी रुपिया (7388/-) के सहयोग मिलल बा. सहजोग राशि आ तारीख का क्रम से पाँच गो सर्वश्रेष्ठ भामाशाह -
(1)
अनुपलब्ध
18 जून 2023
गुमनाम भाई जी,
सहयोग राशि - एगारह सौ रुपिया

(3)

24 जून 2023 दयाशंकर तिवारी जी,
सहयोग राशि - एगारह सौ एक रुपिया
(4)
18 जुलाई 2023
फ्रेंड्स कम्प्यूटर, बलिया
सहयोग राशि - एगारह सौ रुपिया
(7)
19 नवम्बर 2023
पाती प्रकाशन का ओर से, आकांक्षा द्विवेदी, मुम्बई
सहयोग राशि - एगारह सौ रुपिया

(11)
24 अप्रैल 2024
सौरभ पाण्डेय जी
सहयोग राशि - एगारह सौ रुपिया

पूरा सूची
एगो निहोरा बा कि जब सहयोग करीं त ओकर सूचना जरुर दे दीं. एही चलते तीन दिन बाद एकरा के जोड़नी ह जब खाता देखला पर पता चलल ह.

संस्तुति

हेल्थ इन्श्योरेंस करे वाला संस्था बहुते बाड़ी सँ बाकिर स्टार हेल्थ एह मामिला में लाजवाब बा, ई हम अपना निजी अनुभव से बतावतानी. अधिका जानकारी ला स्टार हेल्थ से संपर्क करीं.
शेयर ट्रेडिंग करे वालन खातिर सबले जरुरी साधन चार्ट खातिर ट्रेडिंगव्यू
शेयर में डे ट्रेडिंग करे वालन खातिर सबले बढ़िया ब्रोकर आदित्य बिरला मनी
हर शेेयर ट्रेेडर वणिक हैै - WANIK.IN

Categories

चुटपुटिहा

सुतला मे, जगला में, चेत में, अचेत में। बारी, फुलवारी में, चँवर, कुरखेत में। घूमे जाला कतहीं लवटि आवे सँझिया, चोरवा के मन बसे ककड़ी के खेत में। - संगीत सुभाष के ह्वाट्सअप से


अउरी पढ़ीं
Scroll Up