भोजपुरी सिनेमा के मेगास्टार मनोज तिवारी, जिनका के हालही में भइल एगो सिने अवार्ड समारोह में एह दशक के सितारा कहि के सम्मानित कइल गइल रहे, आजुकाल्हु गलत कारण से चरचा में बाड़न. मनोज तिवारी के शिकायत बा कि कुछ अखबार आ मीडिया में उनुका तलाक से जुड़ल खबर गलत तरीका से दिहल गइल.

मनोज के कहना बा कि ऊ सभका के बतावल चाहत बाड़न कि मनोज अपना बीबी आ बेटी से बेइंतहा प्यार करे ला आ कबहू ना चहले कि अपना बीबी के तलाक देबे के पड़ो. अपना बेटी आ बीबी से अलग रहे के सोचिये के मनोज तिवारी सिहर जात बाड़न. मनोज के कहना बा कि आजु ले ऊ कवनो अइसन काम नइखे कइलन जवना से ऊ खुद का नजर में नीचे गिर जासु. बाकिर कुछ गलतफहमियन का चलते उनुकर पत्नी जिद्द ठान लिहले बाड़ी कि उनुका तलाक चाहीं आ बेमरजी मजबूरी में आ के मनोज के ओह कागज पर दस्तखत करे के पड़ल जवना में आपसी राय से तलाक लेबे के बाति लिखल बा. ई सब मनोज तिवारी अपना बीबी के तनाव खतम करे खातिर कर दिहलन बाकिर ऊ सभका से निहोरा करत बाड़न कि एह दुनिया के कवनो भलामानुष उनुका पत्नी के समुझा बुझा के मना सको त उनुका बहुते खुशी होई.

आपसी राय से तलाक वाला मामिला में कोर्ट छह महीना के समय देला जवना बीच मरद मेहरारू अपना फैसला पर फेर से विचार कर सकसु. एह से एह समय का भीतर अगर केहू ई शुभ काम करा सके त बहुते खुशी के बात होखी.


(स्रोत – शशिकान्त सिंह)

7 thought on “घर फूटे गँवार लूटे”
  1. भाई मनोज जी,
    अपना पत्नी से संबंध विच्छेद ना होखो, राउर ई चाह जो सचमुच हृदय से बा त बिशवास करीं, भगवान राउर जरूर सुनिहें. धीरज धरीं, भगवान सभ ठीके करिहें.
    हमार शुभकामना.
    राउर
    डॉ. रामरक्षा मिश्र विमल

  2. एहले बाउर का होई..लेकिन भगवान बाड़े…हम त इहे कहबि कि मनोज.जी.भगवान में भरोसा राखीं..ऊ..सब ठीक करिहें…

कुछ त कहीं...

This site uses Akismet to reduce spam. Learn how your comment data is processed.